Hyppää sisältöön
Valtioneuvosto ja ministeriöt
Media
Valikko

Haldâttâs linjij väldikodálijn já kuávlulijn avžuuttâsâin koronaepidemia levânem estim várás

Statârääđi kanslia 16.10.2020 14.02

Haldâttâs linjij väldikodálijn já kuávlulijn avžuuttâsâin koronaepidemia levânem estim várás
Haldâttâs linjij ráđádâlmijn onne roovvâdmáánu 15. peeivi sehe väldikodálijn já kuávlulijn avžuuttâsâin koronavirus levânem estim várás.

Avžuuttâsâin váldoo huámmášumán epidemiologâlâš tileárvuštâllâm. Haldâttâs taha avžuuttâsâin prinsiipmiärádâs staatârääđi almosčuákkimist puáttee oho (okko 43).

Väldikodálâš káiduspargoavžuuttâs

Tastko koronavirusepidemia lii vijđáht leevvânmin väldikodálávt, te staatârääđi avžuut, ete almos sektor pargeeh porgâččii káiduspargoost nuuvt vijđáht ko máhđulâš, jis pargoh tom máhđulisteh. 
Staatârääđi avžuut siämmáánáál vijđes káiduspargo meid priivaat pargoadeleijeid. Alda- já káiduspargo oohtânheiviittem árvuštâllâm tábáhtuvá pargosoojijn. Toos lasseen pargosoojijn kalga ovdediđ pargo-orniistâlmijd, moiguin kepideh aldakontaktijd já eres riskâtahheid.
Väldikodálávt káiduspargoavžuuttâs lii vyeimist tuáistáážân. Avžuuttâs vyeimistorroom tárkkojeh majemustáá juovlâmáánu 31. peeivi 2020.

Staatârääđi toohâm linjimeh já avžuuttâsah káiduspargoost iä čoonâ pargoadeleijeid riävtálávt.

Haldâttâs avžuuttâsah kuávloid 

Haldâttâs avžuuttâsah kuávloid láá juohhum epidemiatile mield. 
Epidemia vuáđutääsi kuávluin avžuutteh, ete paijeel 50 ulmuu aalmugtilálâšvuođâin já ääigiájánâsâin váldojeh huámmášumán Tiervâsvuođâ já pyereestvaijeem lájádâs já máttááttâs- já kulttuurministeriö ravvuuh hygienia-avžuuttâsâin já torvokooskâin. 

Ääigiájánâstooimâst já almolij soojij kiävtust kalga huolâttiđ, ete uásálisteeh já juávhuh pasteh tuođâlávt velttiđ aldakontakt nubijdis.

Epidemia jođálmuvvee muddoost haldâttâs avžuut kuávlulii tâi páihálii avžuuttâs velttiđ paijeel 20 ulmuu priivaat tilálâšvuođâi ornim. 

Puoh aalmugtilálâšvuođâin váttoo Tiervâsvuođâ já pyereestvaijeem lájádâs já máttááttâs- ja kulttuurministeriö ravvui nuávdittem. Siste tábáhtuvvee aalmugtilálâšvuođâi uásálisteemeeri räijejuvvoo piälán táválii sajemeereest.

Almolij soojij kevttimist kalga huolâttiđ tast, ete uásálisteeh já juávhuh pasteh tuođâlávt velttiđ aldakontakt nubijdis. Toos lasseen äššigâsmeeri soojij siste räijejuvvoo piälán táválii äššigâsmeereest.

Soojij kiävtturaijiittâsâi vuáđuld avžuutteh koskâldittiđ rävisulmui ääigiájánâsâi siste tábáhtuvvee juávkkuhárjuttâsâid ollâ njuámmumriiskâ tiileest. 

Jyehiahasij ulmui ääigiájánâsâi juávkkuhárjuttâstooimâ kolgâččii orniđ tienuuvt, ete uásálisteeh já juávhuh pasteh tuođâlávt velttiđ aldakontakt nubijdis. 

Haldâttâs avžuut meid, ete ollâškoovlah sirdâšuveh káidusmáttááttâsân, kuittâg väldimáin huámmášumán velttidmettum aldamáttááttâs táárbuid.

Epidemia levânemmuddoost haldâttâs avžuut kuávlulii tâi páihálii avžuuttâs velttiđ paijeel 10 ulmuu priivaat tilálâšvuođâid. Táárbu mield aalmugtilálâšvuođâi ornim puáhtá kieldiđ ollásávt.

Haldâttâs meid avžuut koskâldittiđ ääigiájánâsâi juávkkutooimâid tiilij kiävtturaijiittâsâi vuáđuld táárbu mield ollásávt. Párnái já nuorâi ääigiájánâsâi ooleest kalga kuittâg kuorâttâllâđ eromâš tárkká. 

Táárbu mield almolijd soojijd puáhtá steŋgiđ ollásávt, väldimáin huámmášumán soojij kiävtu jiešvuođâ.

Majemuu mudo vyehhin haldâttâs avžuut nube tääsi oppâlájádâsâi sirdâšum káidusmáttááttâsân, kuittâg väldimáin huámmášumán velttidmettum aldamáttááttâs táárbuid.

Haldâttâs avžuuttâsah iä čoonâ riävtálávt. 

Lasetiäđuh: 
•    vt. kansliahovdâ Juha Majanen, p. 0295 530 247 já pajehovdâ Juha Sarkio, p. 0295 530 031, staatâvarijministeriö, ovdânommâ.suhânommâ@vm.fi (káiduspargoavžuuttâs)
•    kansliahovdâ Anita Lehikoinen, máttááttâs- já kulttuurministeriö, p. 0295 330 182, ovdânommâ.suhânommâ@minedu.fi

Lahtos: Covid-19-tilekejâstâh 15.10.2020 | THL

Palaa sivun alkuun