Hyppää sisältöön
Valtioneuvosto ja ministeriöt
Media
Valikko

Oaiveministtar Marin: Veahkehemiin ja doarjumiin guhtet guimmiideamet ceavzit váttes áiggiid badjel

Stáhtaráđi kansliija 17.4.2020 17.00

Spiehkastatdilit váikkuhit midjiide buohkaide. Mii leat šaddan ráddjet dehe luohpat máŋggain midjiide  dehálaš áššiin. Fuolla iežamet ja lagaš olbmuid dearvvašvuođas ja veadjimis, birgenlágis ja birgemis lea máŋggain min árgabeaivvis mielde. Guovdu roasuid lea buorre bisánit smiehttat, mot mii veadjit ja mot doarjut guhtet guimmiideamet váttes áiggiid badjel.

- Deaivat buohkat árggasteamet spiehkastatlaš áiggi ja diliid, muhto buohkat iežamet vuogi mielde. Vaikko roassu lea oktasaš, de dat guoskkaha olbmuid sierra lági mielde, oaiveministtar Sanna Marin cealká. 

Suopma doaibmá -gulahallanfidnu boahtá johtui

Stáhtaráđđi hálida oasistis doarjut dán barggu, mii dáhpáhuvvá árggas. Suopma doaibmá – gulahallanfidnu, mii dál johttáhuvvo, ulbmilin lea váldit oassálastit ja váldit buohkaid mielde, dahkat oinnolažžan buori barggu, man servodaga sierra doaibmit dahket. Fidnu fállá arvesuoji, man vuolde ovdamearkka dihte iešguđetlágán dáhpáhusat sáhttet lágiduvvot, dál virtuála dáhpáhusat ja spiehkastatdiliid nohkama maŋŋel dáhpáhusat duođalaš máilmmis. Fidnu joatkahuvvá ođđajagimánu 2021 rádjái, muhto sávaldat lea, ahte dás šaddá juoidá eanet bissovaččaid. Juoidá, mii guoddá guhkás boahtteáigái.  

- Giitevažžan beassat duođaštit, mot nu máŋggat olbmot, organisašuvnnat ja fitnodagat leat hálidan veahkehit ja doarjut nuppiid. Soames fitná gávppis boarana ovddas, nubbi doarju gáiddosskuvlamáná ruovttubargguin, okta áŋggirda árggastis earáid dearvvašvuođa ja buresbirgejumi dorvvasteami várás. Unna ja stuora dagut, mat buot dárbbašuvvojit dáid váttes áiggiid, oaiveministtar Marin cealká.

Vaikko fidnu bođii easka johtui, fárrui leat juo vuolgán 16 doaibmi: Suoma Rukses Ruossa, Suoma Girdigádjunsearvi SLPS, Mieli Ry, Eatnanbealuštusa skuvlen, Suoma Vuojadanoahpahus- ja Heakkagádjunlihttu rs, Suoma gádjunbeanalihttu, Suoma Bargoveaga Valáštallanlihttu TUL, Suoma Iskárat, Nissoniid Válmmasvuohtalihttu, Mannerheima mánáidsuodjalanlihttu, Suoma Gádjunsuorggi Guovddášsearvi, Suoma Rádioamatevralihttu SRAL, Eatnanbealuštannissoniid Lihttu rs, Marttalihttu, Allianssi ja Gádjot mánáid. Earánai doaibmit leat boahtime mielde.

Muital iežat muitalusa dovddaldagaiguin #suomitoimii #yhdessä

Stáhtaráđi kommunikašuvdna juohká ovttasbargoguimmiidisguin dovdamušaid ja bottaid veahkeheaddji, movttiidahtti ja roassodilis nuppiid dorjjodeaddji Suomas dovddaldagaiguin #suomitoimii #yhdessä.

Lassidieđut fidnus suomitoimii.fi

Eatnasat muitalit iežaset veahkehan nuppiid koronaroasu áigge

Veahkehitgo olbmot guhtet guimmiideaset? Vástádus lea juo. Eatnasat Nannan-Suomas orruin muitalit iežaset veahkehan nuppiid koronaroasu áigge. Dábálaččamusat veahkki lea fállojuvvon bearašlahtuide ja fulkkiide, geat eai oro seamma dállodoalus. Maiddái ustibat, smávvafitnodatolbmot ja ránnát leat veahkehuvvon. Veahkehanhállu boahtá ovdan stáhtaráđi kansliija Statistihkkaguovddážis dagahan jearahallandutkamušas, mas dutkojuvvojedje 15-74-jahkásaččaid oainnut fierbmejearahallamin 2.-5.4.2020.

Suopmelaččat muosáhe iežaset ožžon bures dieđu koronaroasu dagahan nuppástusain iežas eallimii. Juobe ovcci logi vástideaddjis (89 %) muitale iežaset ožžon bures dehe oalle bures dieđu koronaroasu váikkuhusain iežaset árgii. Diehtu lei ožžojuvvon buoremusat guovddáš dieđihangaskaomiin dego televišuvnnas ja aviissain, muhto maiddái bargo- ja stuđerenbáikki sihke iežas lagasbirrasa gaskavuođas ollašuhtton ságastallamat muosáhuvvoje dehálažžan. Eiseválddiid kommunikašuvdnii koronadilis suopmelaččat ledje duhtavaččat. Kommunikašuvdna adnojuvvui luohtehahttin ja bealeheapmen.

Diehtu veahkeha čatnasit. Juobe 96 % vástideddjiin muitale iežaset doahttalan eiseválddiid addin rávvagiid juogo bures dehe oalle bures. Eatnasat vástideddjiin (87 %) leat dahkan dán mielalis dehe oalle mielalis.  

Riikkavulošlakkas (Statistihkkaguovddáža jearahallandutkamuša bohtosat)

Lassidieđut: Stáhtaráđi gulahallanhoavda Päivi Anttikoski, t, 040 536 4821, stáhtaráđi kansliija sihke spesiáladutki Antti Sillanpää, t. 0295 140 012, Dorvvolašvuohtakomitea čállingoddi

Palaa sivun alkuun