Hyppää sisältöön
Valtioneuvosto ja ministeriöt
Media
Valikko

Haldâttâs peividij Suomâ koronavirusstrategia, raijimtooimâid máhđulâš kepidiđ kuuloold já kontrollistum vuovvijn

Statârääđi kanslia 24.4.2020 9.00

Haldâttâs peividij ráđádâlmijn onne cuáŋuimáánu 22. peeivi Suomâ koronavirusstrategia taavdâ levânem estim várás, ko kuulâi äššitobdei árvuštâlmijd koronatiileest.

Haldâttâs ulmen lii ain estiđ virus levânem ohtsâškoddeest, turviđ tiervâsvuođâhuolâttâs naavcâid já suojâliđ eromâšávt ulmuid, kiäh kuleh riskâjuávhoid.

Epidemia ovdánem estim lii Suomâst luhostum tuáistáážân pyereest. Haldâttâs árvuštâl tondiet, ete Suomâst lii máhđulâš sirdâšuđ kuuloold já kontrollistum vuovvijn vijđes ohtsâškodálijn raijimtooimâin njuámmumtavdâlaavâ miäldásii pehtilittum epidemia kontrollistmân. Puoh raijimtooimâid ij kuittâg paste meddâlistiđ ohtân, ko tile lii ain vaigâd.

Suomâ hybridistrategia vuáđđud, toos lasseen, ete kepideh raijimtooimâid kontrollistum vuovvijn, testaa, čuávu, sierrii já tipšo –juurdâšmân. Tast vijđes testam, pehtilis tubdâstum tavdâtábáhtusâi já -salvânij čuávvum, pyeccei sierrim já painâšum ulmui karanteen estih taavdâ levânem.

Hybridistrategia uássin haldâttâs juátká epidemia tarkkuumist kevttimnáál mobilheiviittâs kiävtunväldim valmâštâllâm. Heiviittâs robdâiähtun lii rijjâtátulâšvuotân vuáđuduvvee já ovtâskâs ulmuu tiätusyeje kunnijâttee malli.

Staatâčällee Martti Hetemäki jođettem valmâštâllâmjuávkku taha vyesimáánu 1. peeivi räi vuávám tađe várás, ete luovânep raijimtooimâin olmâ ääigi já sirdâšup taavdâ levânem estimist čuávvoo muudon. Haldâttâs ráđádâllâm ääšist uárnejuvvoo vyesimáánu 3. peeivi.

Valmâštâllâmjuávkku taha iävtuttâsâid arâšoddâdem já škovlim uásild tienuuvt, ete miärádâsâid raijimtooimâi juátkimist puáhtá toohâđ jo ovdil vyesimáánu aalgâ. Talle škovlim uárnejeijeeh kiergâneh táárbu mield varriidâttâđ aldamáttááttâs orniimân.

Haldâttâs čuávu tárkká tohhum miärádâsâi vaikuttâsâid taavdâ ovdánmân já lii táárbu  mield kiärgus uđđâ toimáid, jis tile nuuvt váátá.

Haldâttâs linjij, ete paijeel 500 ulmuu aalmugtilálâšvuođâi kieldim kalga juátkiđ kuittâg syeinimáánu 31. peeivi räi. Kuávluhaldâttâhvirgáduvah pyehtih njuámmumtavdâlaavâ vuáđuld kieldiđ aalmugtilálâšvuođâid enâmustáá mánuppajan häävild. Loppâkeesi já algâčoovčâ uásild árvuštâllâm tahhoo majemustáá kesimáánu aalgâst.

Lasetiäđuh: staatârääđi viestâdemhovdâ Päivi Anttikoski, p. 040 536 4821

Palaa sivun alkuun