Hyppää sisältöön
Valtioneuvosto ja ministeriöt
Media
Valikko

Ráđđehus áigeguovdilasttii Suoma koronavirusstrategiija, ráddjenoaimmaid sáhttá burgit cehkiid mielde ja nu ahte dat bissot hálddus

Stáhtaráđi kansliija 24.4.2020 9.00

Ráđđehus áigeguovdilasttii ráđđádallamisttis odne cuoŋománu 22. beaivve Suoma koronavirusstrategiija dávdda viidáneami eastima go lei gullan áššedovdiid árvvoštallamiid koronadilis.

Ráđđehusa ulbmilin lea ain eastit virusa viidáneami servodagas, dorvvastit dearvvašvuohtafuolahusa suvdinnávcca ja suodjalit earenoamážit olbmuid, geat gullet riskajovkui.

Epidemiija ovdáneami caggamis Suopma lea lihkostuvvan doaisttážii bures. Ráđđehus árvvoštallá dan dihte, ahte Suomas lea vejolaš sirdásit cehkiid mielde ja nu ahte viiddes servodatlaš ráddjendoaimmat bissot hálddus gitta njoammundávdallága miel beavttálmahtton epidemiija hálddašeapmái. Buot ráddjendoaimmain ii goitge sáhte luohpat ovttatmano, daningo dilli lea ain duođalaš.

Suoma hybridastrategiija mieigá ráddjendoaimmaid hálddašuvvon burgima olis deste, guora, sirre ja divššo -jurddašeapmái. Das viiddes desten, beaktilis identifiserejuvvon dávdadáhpáhusaid ja -gollosiid guorran, buohccán olbmuid sirren sihke suojehuvvanvuložiid karantena cagget dávdda ovdáneami.  

Hybridastrategiija oassin ráđđehus joatká epidemiija hálddašeamis adnon mobiilaapplikašuvnna atnuiváldima válmmastallama. Applikašuvnna ravdaeaktun lea málle, mii vuođđuduvvá eaktodáhtolašvuhtii ja gudnejahttá ovttaskas olbmo diehtosuoji.

Stáhtačálli Martti Hetemäki jođihan válmmastallanjoavku dahká miessemánu 1. beaivve rádjái plána ráddjendoaibmabijuin eret beassamis rievttesáigásaččat ja sirdáseamis dávdda ovdáneami caggama čuovvovaš muttu guvlui. Ráđđehusa ráđđádallan áššis ordnejuvvo miessemánu 3. beaivve.

Válmmastallanjoavku dahká ovdanbuktojumiid árabajásgeassima ja skuvlema oasis nu, ahte mearrádusat ráddjendoaimmaid joatkimis sáhttet dahkkojuvvot juo ovdal miessemánu álggu. Dalle skuvlema ordnejeaddjit háhppehit dárbbu mielde ráhkkanit lagasoahpahusa ordnemii.

Ráđđehus čuovvu dárkket dahkkojuvvon mearrádusaid váikkuhusaid dávdda ovdáneapmái ja lea dárbbu mielde gárvvis ođđa doaimmaide, juos dilli dan gáibida.  

Ráđđehus linnjii, ahte badjel 500 heakka álbmotdilálašvuođaid gieldu gánnáha joatkit aŋkke suoidnemánu 31. beaivve rádjái. Guovlohálddahusdoaimmahagat sáhttet njoammundávdalága vuođul gieldit álbmotdilálašvuođaid eanemusat mánnui háválassii. Loahppageasi ja álgočavčča dilálašvuođaid oasis árvvoštallan dahkkojuvvo maŋemusat geassemánu álggus.

Lassidieđut: stáhtaráđi gulahallanhoavda Päivi Anttikoski, t. 040 536 4821

 

Palaa sivun alkuun