Hyppää sisältöön
Valtioneuvosto ja ministeriöt
Media
Valikko

Bargi bargogeatnegasvuhtii guoski gearggusvuođalága atnuiváldinásahus riikkabeivviide

Stáhtaráđi kansliija 26.3.2020 13.30

Stáhtaráđđi attii gaskavahku 25. njukčamánu ásahusa, man mielde dearvvasvuođafuolahusa bargoveaga gearggusvuođalágas oaivvilduvvon geatnegasvuođa bargat sáhttá heivehit olles riikkas. Bargui sáhttet gohččut sihke almmolaš ja priváhtta dearvvasvuođafuolahusa surggiin doaibmi olbmuid, geat leat ožžon suorggi skuvlejumi ja geat leat deavdán 18 jagi muhto eai 68 jagi.

Bargogeatnegasa sajádaga ja vuoigatvuođaid suddjema várás bohtet heivehanláhkái maiddái gearggusvuođalága 14 logu njuolggadusat. Dát njuolggadusat gusket bargogeatnegasvuođa biirii gulli olbmuid almmuhangeatnegasvuhtii, bargomearrádusa sisdollui, bargomearrádusa addima ráddjehusaide ja áššiid maid váldit vuhtii bargomearrádusa attediin. Lassin heivehanláhkái bohtet bargogeatnegasvuođagaskavuhtii, bargogeatnegasvuođagaskavuođa eavttuide ja bargoaddi dieđuidaddingeatnegasvuhtii sihke bargogeatnegasaid registtarii guoski njuolggadusat.  

BE-doaimmahagat doibmet bargogeatnegasvuođa ollašuhttimis doaibmaválddálaš eiseváldin. 

Ásahus boahtá fápmui 26.3.2020 ja dat lea fámus 13.4.2020 rádjái.

Ráđđehus lean cealkán ovttas dásseválddi presideanttain Suoma leat spiehkastatdilis koronavirusdili geažil. Stáhtaráđđi attii 17.3.2020 guokte gearggusvuođalága mieldásaš atnuiváldinásahusa riikkabeivviide. Riikkabeaivvit mearridii 18.3.2020, ahte gearggusvuođalága 86, 88, 93-95 ja 109 §:s ásahuvvon doaibmaválddi atnuiváldimis addojuvvon stáhtaráđi ásahus oažžu báhcit fápmui earret bargi bargogeatnegasvuhtii guoski ásaheami.

Duogášdieđut gearggusvuođalágas

Gearggusvuođalágas ásahuvvo eiseválddiid doaibmaválddi birra spiehkastatdili áiggi. Gearggusvuođalágas meroštallojuvvon doaibmaválddi sáhttá geavahit dušše, juos dili ii sáhte hálddašit eiseválddiid dábálaš doaibmaválddiin. Gearggusvuođalága vuođul ráddjejit riikkavuložiid vuoigatvuođat ja dábálaš eallima dušše, juos dat lea vealtemeahttun álbmoga suddjema várás.

Gearggusvuođalágas ásahuvvon doaibmaválddi atnuiváldimis eanemusat guđa mánotbadjái mearriduvvo stáhtaráđi ásahusain (atnuiváldinásahus), go stáhtaráđđi lea ovttas dásseválddi presideanttain cealkán riikkas leat spiehkastatdilis. Loahpalaš mearridanváldi fápmuiboahtimis lea riikkabeivviin. Dat mearrida, boahtágo stáhtaráđi addin ásahusa lassedoaibmaváldi atnui ollásit dahje oasil. Riikkabeaivvit sáhttá maiddái gomihit stáhtaráđi addin ásahusa.

Hohpolaš dilis lea vejolaš váldit lasseválddi atnui dakkaviđe. Maiddái dalle ásahus dolvojuvvo riikkabeivviid gieđahallamii dakkaviđe. Ásahusa galgá doalvut riikkabeivviide vahku siste, dahje muđui ásahus healbá.

Stáhtaráđi ásahus gearggusvuođalága 95 § 2 momeanttas ásahuvvon doaibmaválddi atnuiváldimis ja 96-103 § heiveheamis

Lassedieđut: ráđđádalli virgeolmmoš Elina Isoksela, bargo- ja ealáhusministeriija, tel. 0295 063 719, ja jođiheaddji Jaska Siikavirta, sosiála- ja dearvvasvuođaministeriija, tel. 0295 163 394 

Palaa sivun alkuun