Valtioneuvosto ja ministeriöt Media
Valikko

Ráđđehus mearridii burgit árrabajásgeassima ja vuođđooahpahusa ráddjehusaid

Stáhtaráđi kansliija 30.4.2020 12.30

Ráđđehus mearridii ráđđádallamiin otne cuoŋománu 29. beaivve burgit árrabajásgeassima ja vuođđooahpahusa ráddjehusaid dearvvašvuođaeiseválddiid árvvoštallama vuođul. Ruovttoluotta lagašoahpahussii sirdásit miessemánu 14. beaivve rájes kontrolleremiin ja dorvvolašvuođas fuolahemiin. Seammás oahpahusa lágideaddjit gerget ráhkkanit oahpahusa ollašuhttimii bargoveaga- ja eará ordnemiid dáfus.

Epidemiologalaš árvvoštallama vuođul eai leat šat ákkat joatkit válmmašvuođalága heivehanásahusa, mii guoská árrabajásgeassimii ja vuođđooahpahussii.

Riikkaidgaskasaš ja ruovttueatnama vásáhusat leat čájehan, ahte mánáid rolla koronavirusnjoammumiid leavvamis ii leat seammalágan go rávesolbmuin. Mánát eai jur leat njoammuma gáldut. Dálá dieđuid vuođul skuvllaid rahpan lea danin dorvvolaš sihke ohppiide ja bargiide.

Oahpahus- ja kulturministeriija ja Dearvvašvuođa ja buresbirgejumi lágádus leat ráhkadan rávvagiid ordnemiidda, maid čuovvumiin árrabajásgeassimii ja vuođđooahpahussii sáhttet máhccat. Deháleamos lea garvit dárbbašmeahttun fysalaš kontávttaid ja lágidit oahpahussajiid nu, ahte olbmuid gaskkas lea eambbo sadji go dábálaččat. Maiddái gaskadiimmut ja skuvlaboradeapmi galget lágiduvvot iežas luohkáin dahje joavkkuin. Stuorra čoahkkaneamit, degomat giđđadoalut, eai lágiduvvo. Maiddái bargoveahka galgá doaibmat seamma mánnájoavkkuin ja hygieniijarávvagiid galgá čuovvut dárkilit. Skuvlejumi lágideaddjit mearridit ordnemiid detáljaid.

Sosiála- ja dearvvašvuođaministeriija ja oahpahus- ja kulturministeriija válmmaštallet ovttas bagadallanreivve guovlohálddahusvirgedoaimmahagaide. Epidemiija leavvama servodagas ráddjejit árrabajásgeassima ja vuođđooahpahusa oasil njoammudávdalága vuođul.

Doavttir árvvoštallá oassálastetgo riskajoavkkut lagašoahpahussii. Bargiid oasil árvvoštallan dahkkojuvvo oktan bargodearvvašvuođain ja bargoaddiin.

Oahpahusa lágideaddji ii sáhte lágidit oahpahusa gáiddusoahpahussan heivehanásahusa fápmoáiggi nohkama maŋŋel. Gielda ii sáhte iežas mearrádusain mearridit giddet skuvllaid iige gielda sáhte maiddái mearridit lágidit oahpahusa dušše gáiddusoahpahussan. Vuoigatvuohta oažžut vuođđooahpahusa lea vuođđolágas ásahuvvon subjektiivvalaš vuoigatvuohta, mii gullá ovttaveardásaččat buohkaide.

Ráđđehus gieđahallá nuppi dási ja allaskuvlejumi ráddjehusaid maŋŋeleappos.

Lassedieđut:

kansliijahoavda Anita Lehikoinen, tlf. 0295 330 182, ossodathoavda, bajimuš hoavda Eeva-Riitta Pirhonen, tlf. 0295 330 258, oahpahus- ja kulturministeriija, ja stáhtaráđi dieđihanjođiheaddji Päivi Anttikoski, tlf. 040 536 4821

Palaa sivun alkuun