Hyppää sisältöön
Valtioneuvosto ja ministeriöt
Media
Valikko

Nuppástusat koronavirusepidemiija dihte ásahuvvon ráddjehusaide 1. geassemánu

Statârääđi kanslia 1.6.2020 14.30

Koronaráddjehusain luohpaduvvo muttuid mielde ja hálddašuvvon vugiin 1. geassemánu rájes. Mihttomearrin lea caggat epidemiija leavvama nu, ahte dat hehtte nu unnán go vejolaš olbmuid, fitnodagaid, servodaga ja vuođđovuoigatvuođaid ollašuvvama. Geassemánus álggu rájes geahpeduvvojit earret eará čoahkkananráddjehusat ja viiddiduvvojit dilálašvuođaid ja dáhpáhusaid lágideapmi ja dat goas almmolaš báikkit lea rabas. Maiddái restoráŋŋat ja kafeat rahppojuvvojit áššehasaide dihto ráddjehusaiguin seamma áigge olles riikkas. Ráđđehus linnjii bearjadaga, ahte ruovtturiikkas sáhttá mátkkoštit, go čuovvu koronavirusii laktáseaddji dearvvašvuohta- ja dorvvolašvuohtarávvagiid.

Nuppástusat almmolaš dilálašvuođaid čoahkkananráddjehusaide

Eanemustá 50 heakka álbmotdilálašvuođat leat lobálaččat geassemánu 1. beaivvi rájes. Ráddjehusat gusket siste ja olgobirrasiin lágiduvvon almmolaš dilálašvuođaid nappo álbmotdilálašvuođaid ja almmolaš čoahkkimiid.

Almmolaš čoahkkimat leat miellačájeheamit ja eará buohkaide rabas dilálašvuođat, mat čuvvot čoahkkananfriddjavuođa. Álbmotdilálašvuođat leat álbmogii rabas suohtastallandilálašvuođat, gilvvohallamat, čájáhusat dahje eará sullasaš dilálašvuođat. Ráđđehus ávžžuha, ahte dain čuvvot dorvogaskkaid ja hygieniijarávvagiid.

Lágas dárkkuhuvvon čoahkkimat ja dilálašvuođat eai dan sadjái leat ovdamearkka dihte orodeapmi almmolaš lihkadanbáikkiin seamma áigge dahje áššiid dikšun gávpeguovddážis.

Čoahkkananráddjehus ii guoskka priváhtta dilálašvuođaid, dego priváhtta doaluid dahje priváhtta čoahkkimiid. Ráđđehus goittotge ávžžuha, ahte priváhtta dilálašvuođat eai lágiduvvole badjel 50 heggii. Buot dáin dilálašvuođain ávžžuhuvvo doalahit moadde mehtera gaska eará oassálastiide ja fuolahit giehta- ja gossanhygieniijas.

Badjel 50 ja eanemustá 500 heakka álbmotdilálašvuođaid ja almmolaš čoahkkimiid siste ja guovlulaččat ráddjejuvvon olgobirrasis lea vejolaš lágidit erenomášordnedallamiiguin. Guovlohálddahusat leat ásahan dákkár čoahkkimiid ja dilálašvuođaid lágideapmái eaktun dan, ahte čoahkkaneami lágideapmi čuovvu oahpahus- ja kulturministeriija ja Dearvvašvuođa ja buresbirgejumi lágádusa 14.5.2020 rávvaga koronavirusnjoammuma eastadeamis. Badjel 500 heakka álbmotdilálašvuođat leat gildojuvvon 31.7. rádjái.

Guovlohálddahusaid čoahkkananráddjehusmearrádusat leat almmolaš mearrádusat, eaige dat váldde beali juohke ovttaskas dáhpáhussii. Dilálašvuođa lágideaddji fuolaha dáhpáhusa lágideamis nu, ahte dávdadilli ii vearrán. Juohke dáhpáhuslágideaddji dahje doaibmi berre ieš árvvoštallat, mo dat ollašuhttá buoremus lági mielde mearrádusaid áššehaslogu ráddjemis, dorvogaskkain ja hygieniijarávvagiin.

Boles gohccá čoahkkananráddjehusaid

Boles gohccá iežas doaibmanválddi mielde guovlohálddahusaid čoahkkananráddjehusmearrádusaid. Bolesa bargun lea fuolahit das, ahte almmolaš čoahkkimiid ja álbmotdilálašvuođaid lágideapmi čuovvu oassálastiid alimus loguid ja čoahkkananlága. Boles ii goze hygieniijarávvagiid čuovvuma, muhto dáhpáhusaid lágideaddjit fertejit ieža fuolahit koronavirusa leavvama caggamis.

Eará deivvolaš čoahkkanemiide ja priváhtta dilálašvuođaide boles ii darván, jos daid dihte ii šatta várra almmolaš ortnegii ja dorvvolašvuhtii.

Almmolaš báikkit rahppojuvvojit – ee. girjerádjosiidda ja vuojadanhállaide beassá fas

Almmolaš báikkit, mat lea leamašan gitta, rahppojuvvojit hálddašuvvon vugiin geassemánu álggu rájes.  Dákkárat leat earret eará stáhta ja gielddaid museat, teáhterat, Álbmotopera, kulturdálut, girjerádjosat, girjerádjobiillat, Álbmotarkiivva áššehas- ja dutkisálebálvalusat, astoáiggelanjat- ja báikkit, vuojadanhállat ja eará valáštallanbáikkit, nuoraidvisttit, riekkesdoaibmavisttit, servviid čoahkkananbáikkit, veajuiduhtti bargodoaibma ja bargoguovddážat.

Ovdamearkka dihte konsearttat, teáhterčájáhusat, ealligovvačájáhusat, festiválat ja kulturdáhpáhusat leat álbmotdilálašvuođat. Daid gusket guovlohálddahusa ráddjenmearrádusat, mat čuvvot njoammudávdalága.

Girjerádjosiid ja museaid bistevaš, dábálaš doaimmas ii lea gažaldat álbmotdilálašvuođas, eaige čoahkkananráddjehusat guoskka dán doaimma. Ráddjehusat, mat gusket álbmotdilálašvuođaid, gusket goittotge girjerádjosiid ja museaid dilálašvuođaid ja dáhpáhusaid. Dilálašvuođain ja dáhpáhusain galgá váldit vuhtii alimus oassálastilogu, mii lea 50 heakka dahje erenomášordnedallamiiguin 500 heakka.

Valáštallangilvvuid ja -luohkáid sáhttá álggahit erenomášordnedallamiiguin geassemánu álggu rájes, ja dain galgá čuovvut álbmotdilálašvuođaid guoski heaggaloguid ja eará ráddjehusaid ja maiddái DBL ja oahpahus- ja kulturministeriija rávvagiid.

Álbmotdilálašvuođaid ráddjehusat eai guoskka vuojadanhállaid ja lihkadanbáikkiid dábálaš bistevaš doaimma. Valáštallanservviid ja lihkadanbáikkiid bajásdoallit fertejit liikká ieža árvvoštallat, mo dat heivehit eiseválddiid rávvagiid buoremus vuogi mielde báikkálaš diliide ja nu ahte dat sihkkarastet áššehasaid ja bargiid dorvvolašvuođa.

Dearvvašvuođa ja buresbirgejumi lágádusa ja oahpahus- ja kulturministeriija 14.5.2020 rávvagis ávžžuhuvvo, ahte mánáid ja nuoraid leairraid doaimmat leat ráddjejuvvon eanemustá 50 heakka joavkkuide.

Maiddái dáhpáhusain, mat báhcet čoahkkananráddjehusaid olggobeallái, lea dehálaš váldit vuhtii dábálaš rávvagiid hygieniija- ja eará ordnedallamiin, maiguin virusa leavvan caggojuvvo.

DBL ja oahpahus- ja kulturministeriija leat addán rávvaga koronavirusnjoammumiid eastadeamis álbmotdilálašvuođaid almmolaš čoahkkanemiid dáfus ja maiddái almmolaš báikkiid geavaheamis. Musealágádus lea addán dárkilut rávvagiid museaid doaimmaide, ja guovlohálddahusat leat addán ávžžuhusaid girjerádjosiid doaimma erenomášgažaldagaide.

Restoráŋŋat ja kafeat rahppojuvvojit dihto ráddjehusaiguin

Restoráŋŋat ja kafeat rahppojuvvojit áššehasaide dihto ráddjehusaiguin seamma áigge olles riikkas geassemánu álggus. Dalle boahtá fápmui láhka njoammudávdalága gaskaboddosaš nuppástuhttimis. Láhka lea fámus 1.6.2020–31.10.2020. Dásseválddi presideanta nannii lága, ja stáhtaráđđi attii dasa gullevaš ásahusa bearjadaga 29. miessemánu.

Biepmadangávppit ožžot leat rabas diibmu 6–23. Alkoholajuhkamušaid vuovdin lea lobálaš dušše diibmu 9–22. Áššehasaid alimus lohku lea ráddjejuvvon beallái dábálaš logus restoráŋŋaid siste.

Stáhtaráđđi galgá árvvoštallat jeavddálaččat, leatgo lága ráddjehusat iešguđet guovllus vealtameahttumat, vai njoammudávdda leavvan caggojuvvo.

Biepmadangávppit leat geatnegahttojuvvon beavttálmahttit hygieniija ja fuolahit áššehasaid gaskasaš dorvvolaš gaskkain. Buot áššehasain galgá leat iežas čohkansadji beavddi dahje duolbabeavddi guoras.  Oastimiid sáhttá ieš viežžat ovdamearkka dihte diskka luhtte. Dan sadjái áššehasat eai oaččo ieža váldit borramuša ja juhkamuša ovdamearkka dihte ng. buffetbeavddis.

Ruovtturiikkas oažžu mátkkoštit, go fal čuovvu dearvvašvuohta- ja dorvvolašvuohtarávvagiid

Ruovtturiikkas oažžu mátkkoštit, go čuovvu koronavirusii laktáseaddji dorvvolašvuohtarávvagiid. Mátkkošteaddjit ja turismafitnodagat galget čatnasit doaimmaide, maiguin eastadit koronavirusnjoammumiid. Ráđđehus mearridii áššis čálalaš meannudeamis bearjadaga 29. miessemánu.

Bargo- ja ealáhusministeriija ja sosiála- ja dearvvašvuođaministeriija leat čállán rávvagiid dorvvolaš ruovtturiikkas mátkkošteami álggaheapmái Suomas. Rávvagat bohtet fápmui 29.5.2020. Turismafitnodagat ja mátkkošteaddjit leat geatnegahttojuvvon čuovvut rávvagiid ja heivehit iežas doaimmaide.

Lassedieđut:

Boleshálddahusa mediatelefovdna (virgeáigge), tel. 050 399 9039, [email protected] (čoahkkananráddjehusaid gohccin)
Bajithoavda Esko Ranto, OKM, p. 0295 330 115 (lihkadan- ja nuoraidáššit)
Bajithoavda Riitta Kaivosoja, OKM, p. 0295 330 129 (kultur- ja dáiddapolitihkka)
Hálddahusráđđi Ismo Tuominen, [email protected] (biepmadangávppit)
Áššedovdi Ida Müller, bargo- ja ealáhusministeriija, tel. 029 504 7033
Bajitdoavttir Paula Tiittala, sosiála- ja dearvvašvuođaministeriija, tel. 029 516 3744

Telefonrávven

Riikkaviidosaš telefonrávven fállá almmolaš dieđu koronavirusa birra. Rávvemis ii oaččo dearvvašvuođarávvema iige rávvema fáhkkatlaš dilálašvuođaide. Rávvema nummár lea 0295 535 535, ja dat lea rabas árgabeivviid dii 8-21 ja lávvordaga dii 9-15.

Eanet áššis
Ráddjehusat koronavirusa áigge – vn.fi (suomagillii)
Dávjá jerrojuvvon gažaldagat – Guovlohálddahus (suomagillii)
Ráva koronavirusnjoammumiid eastadeamis álbmotdilálašvuođaid ja almmolaš čoahkkanemiid dáfus ja almmolaš báikkiid geavaheamis (suomagillii)

Palaa sivun alkuun