Valtioneuvosto ja ministeriöt Media
Valikko

Haldâttâs linjij räjijotoluv čovgimist Ruotâ- já Taažâ vuástásii rääjist - Åland pyecceetipšo torvejuvvoo

Statârääđi kanslia 7.4.2020 17.00

Haldâttâs meridij paijeelmiärálii staatârääđi čuákkimist onne cuáŋuimáánu 7. peeivi juátkiđ räjikocceem koskâpuddâsii maacâtmist sisraajijd tohhum miärádâs sehe jotoluv raijim vyeimistorroom. Vyeimistorroomäigi juátkoo 14.4.–13.5.2020.

Haldâttâs ulmen lii ain kepidiđ jotteem Ruotâ já Taažâ koskâsii rääjist orroo luándulii pargoostjotteemkuávlust. Täst ovdâskulij syevih tuše aaibâs velttidmettum pargomätkijotoluv, já pargest kalga leđe pargoadeleijee čujottem tuođâštus pargo velttidmettumvuođâst.

Váldunjuolgâdus lii, ete puoh sisraajij rasta Suomân puáttee ulmuuh láá Suomâst orroom ääigi kenigittum nuávdittiđ Suomâ tiervâsvuođâvirgeomâhái ravvuid já pissoođ karanteen västideijee tiileest 14 pirrâmpeivid Suomân puáttim rääjist.

Vátámâš pisomist 14 pirrâmpeivid karanteen västideijee tiileest ij kuoskâ velttidmettum vuosâtipšo já kááijumtooimâ pargeid tâi täävvirjotoluv jođettempargeid. Haldâttâs meid kiäsá pargoadeleijeid, ete sij selvâttiččii vuovijd kepidiđ pargei jotteem rääji rasta ovdâmerkkân nuuvt, ete uárnejeh pargeid ijâstâllâmsoojijd pargoostjotteempäikkikoddeest.

Suomâ vuástásii eennâmrääjist Ruotâ já Taažâ peln pargoost jottee syemmiliih kalgeh leđe karanteen västideijee tiileest, ko sij láá Suomâ kuávlust. Spiekâstâhhân váldunjuolgâdusâst pargeeh sättih toin iävttoin juátkiđ pargoostjotteem, ete nuávditteh karanteenravvuid.

Ruotâst tâi Taažâst Suomân puáttee pargeeh kalgeh nuávdittiđ ravvuid (THL) njuámmumriiskâ kepidem várás já orroođ karanteen västideijee tiileest máhđulâšvuođâi mield nuuvt Suomâst ko meid pääihist.

Suomâ ana meid velttidmettumin tom, ete Ruotâ rävvee tiervâsvuođâhuolâttâspargeid pyereeb suoijiimân já lasseet iskosij väldim taan persovnjuávhust. Toos lasseen Ruotâ lii čonâdâttâm toos, ete Norrbotten lääni pyecceetipšokapasiteet (meid piähtutipšomkapasiteet) puáhtá faallâđ syemmilij pyeccei tipšomân. Lii meid máhđulâš, ete ko epidemia ovdán, te pargeeh iä innig puávtáččii jotteeđ rääji rasta.

Suomâ čuávu tárkká tavdâtile ovdánem já lii varriidâttâm táárbu mield ain raijiđ räjijotoluv.

 

Haldâttâs avžuut tamppâjotoluv lippuvyebdim joskâm 11.4. rääjist                                                                               

Haldâttâs avžuut, ete Suomân Ruotâst, Virost já Saksast puáttee tamppâfinnoduvah jaskeh persovnjotoluv lippuvyebdim tamppáid, moh vyelgih 11.4.2020 tâi ton maŋa eereeb täävvir- já rahtijotolâh. Avžuuttâs lii vyeimist 13.5.2020 räi.

Åland tile

Haldâttâs kenigit sosiaal- jâ tiervâsvuođâministeriö huolâttiđ tast, ete Åland pyecceeviäsu toimâ torvejuvvoo oovtâstpargoost Åland eennâmkode stivráin. Tárbuliih tuáhtáreh uárnejuvvojeh nannaam-Suomâst Ålandân já puáttee pargei kelijdeijee ruotâkielâ máttu visásmittoo. Turkust tuáimee FinnHEMS helikopter palvâl meid Åland.

Åland kiävtust orroo tálhudemhelikopter kirdeeh kuleh vuosâtipšo- já kááijumpargeid, kiäid vátámâš 14 pirrâmpeivid karanteen västideijee tiileest pisomist ij kuoskâ.
Ovdil mainâšum linjimij olášuttem maŋa eres velttidmettum já vuáđustâllum persovnjotolâh lii ain máhđulâš kiäinukirdemijn Tukholmast, Helsigist já Turkust Maarianhaminan. Persovnjotolâh tamppâjotoluv kiäinuin Ålandist nannaam-Suomân lii ain máhđulâš.
Eres velttidmettum jotolâh ličij ohtsâškode toimâm tâi huolâttâsvisesvuođâ tááhust merhâšittee pargoh, moh iä kierdâ ájánem.
Linjimij olášuttem maŋa lii ain máhđulâš huolâttiđ Ålandist orroo, tiervâsvuođâhuolâttâsân maailmvijđosávt kriittâlii piergâspyevtittem jotkuumist. Velttidmettum pargomätkijotolâh lii ain máhđulâš, ko nuávditteh karanteenstivrim.

Palaa sivun alkuun