Hyppää sisältöön
Valtioneuvosto ja ministeriöt
Media
Valikko

Halltõs linnjii raajj-jååttlõõǥǥ čouggmõõžžin Ruõcc da Taarr vuâsttsaž raajâst - Ålaand puõccihååid staanât

Riikksuåvtõõzz kanslia 7.4.2020 17.00

Täʹbbe njuhččmannu 7. peeiʹv halltõs tuʹmmji pâiʹlmeärrsaž riikksuåvtõõzz išttmõõžžâst juäʹtǩǩed raajjvalvvmõõžž kõskkpoddsaž maacctummšest siiʹsǩraajid tuejjuum tuʹmmstõõǥǥ di jååttlõõǥǥ rääʹjtummuž viõǥǥâståårrmõõžž. Viõǥǥâståårramääiʹj jueʹtǩǩeš 14.4.–13.5.2020.

Halltõõzz täävtõssân lij õinn uuʹcceed liikkummuž luândlaž tuâjastjååʹttemvuuʹdest, kååʹtt lij Ruõcc da Taarr vuâsttsaž raajâst. Tåʹlǩ vieʹltʼteʹmes tuâjjmäʹtǩǩjååttlõk lij vueiʹtlvaž pueʹttiääiʹjest, da tuâjjlast âlgg leeʹd tuâjjuʹvddi uʹvddem tuõđštõs tuâj vieʹltʼteʹmesvuõđâst.

Väʹlddvuâkkõssân lij, što puk siiʹsǩraaji rââst Lääʹddjânnma pueʹtti oummu lie Lääʹddjânnmest åårrmõõžžâz ääiʹj õõlǥtum jääʹǩǩted Lääʹddjânnam tiõrvâsvuõttveʹrǧǧniiʹǩǩi vuäppõõzzid da põõššâd karanteeʹn vaʹstteei åårrmõõžžin 14 suutk ääiʹj mââimõs Lääʹddjânnma pueʹttmest looǥǥeeʹl.

Õõlǥtõs põõššmest 14 suutk karanteeʹn vaʹstteei åårrmõõžžin ij kuõsk vieʹltʼteʹmes vuõsshååid da peälštemtuåim tuâjjlaid leʹbe täʹvverjååttlõõǥǥ voozzâmtuâjjlaid. Halltõs ännââtt še tuâjjuʹvddjin, što täk seʹlvteʹče naaʹlid uuʹceed tuâjjlai raaj rââst liikkummuž ouddmiârkkân jäʹrjsteeʹl instummuž tuâjastjååʹttempäiʹǩǩ-kååʹddest.

Lääʹddjânnam vuâsttsaž mäddraajâst Ruõcc da Taarr peäʹlnn tuâjast jooʹtti läʹddla âʹlǧǧe leeʹd karanteeʹn vaʹstteei åårrmõõžžin, ko sij lie Lääʹddjânnam vuuʹdest. Čoʹrstõkkân väʹlddvuâkkõʹsse lij, što tuâjjla vuäiʹtte täin oudldõõzzin juäʹtǩǩed tuâjastjååttmõõžž karanteeʹnvuäʹpstõõzz jääʹǩǩteeʹl.

Ruõccâst da Taarrâst Lääʹddjânnma pueʹtti tuâjjla âʹlǧǧe jääʹǩǩted  vuäʹpstõõzz (THL) njuämmamriisk uuʹccummšest da leeʹd karanteeʹn vaʹstteei åårrmõõžžin vuäittmõõžži mieʹldd, ko lie nuʹtt Lääʹddjânnmest ko še põõrtâst.

Lääʹddjânnam vuäinn lââʹssen vieʹltʼteʹmmen, što Ruõcc vuäʹppast tiõrvâsvuõtthååid tuâjjlaid pueʹrab suõjjõõttmõʹšše da lââʹzzat täi ooumažjoouki teʹsttjummuž. Lââʹssen Ruõcc lij čõnnõõttâm tõõzz, što Norrbotten lääʹn puõccihåiddamkapasiteeʹtt (mieʹldd looǥǥeeʹl viõhsshåiddamkapasiteeʹtt) vueiʹtet taʹrjjeed lääʹdd puõccji håiddma. Lij vueiʹtlvaž še, jõs epidemiavueʹǩǩ huânnan, što tuâjjlain ij teänab leʹčče vueiʹttemvuõtt jååʹtted raaj rââst.

Lääʹddjânnam seuʹrrai tauddvueʹjj ouddnummuž tääʹrǩeld da lij valmštõõvvâm taarb mieʹldd õinn rääʹjted raajj-jååttlõõǥǥ.

Halltõs siâzztââll jõskkâd kaaupšeʹmen päärhåʹdjååttlõõǥǥ liippid 11.4. ääʹljeeʹl                                                

Halltõs siâzztââll Lääʹddjânnma Ruõccâst, Virost da Saksslajânnmest jooʹtti päärhåʹdõhttõõzzid jõskkâd kaaupšeʹmen ooumažjååttlõõǥǥ liippid päärhooʹdid, kook vuejjle 11.4.2020 leʹbe tõn mâŋŋa lokku vääʹldǩani täʹvver- da frahttjååttlõõǥǥ. Siâzztõs lij viõǥǥâst 13.5.2020 räjja.

Ålaand vueʹǩǩ

Halltõs õõlǥat sosiaal- da tiõrvâsvuõttministeria ââʹnned huõl tõʹst, što Ålaand puõccipõõrt tuåimmjummuž staaneet õhttsažtuâjast Ålaand mäddkååʹdd halltõõzzin. Taarbšum dåhttrid jäʹrjstet maadd-Lääʹddjânnmest Ålaʹndde da pueʹtti tuâjjlai riʹjttjeei ruõccǩiõl silttõõzz ainsmââʹttet. Turku-gåårdest tuåimmjeei FinnHEMS helikopter kääzzkâstt še Ålaand.

Tälkkamhelikopteeʹr, kååʹtt lij Ålaand ââʹnnmest, piloott koʹlle vuõsshåidd- da peälštemtuâjjlaid, koid ij kuõsk õõlǥtõs 14 suutk karanteeʹn vaʹstteei åårrmõõžžin põõššmest.
Ooudpeäʹlnn peäggtum linnjummši teâuddmõõžž mâŋŋa jeeʹres vieʹltʼteʹmes da vuâđđõttum ooumažjååttlõk lij õinn vueiʹtlvaž ǩirddum ǩeʹrddemvuârain Tukholmast, Heʹlssnest da Turkust Maarianhaminaaʹje. Ooumažjååttlõk päärhåʹdjååttlõõǥǥ ǩeäinain Ålaandâst maadd-Lääʹddjânnma lij õinn vueiʹtlvaž.

 

Õhttsažkååʹdd tuåimmjummuž leʹbe huõllainsmâttmõõžž peäʹlest miârkteei tuâj, kook jie vueiʹt vueʹrdded, leʹčče jeeʹres vieʹltʼteʹmes jååttlõk.
Linnjummši teâuddmõõžž mâŋŋa lij õinn vueiʹtlvaž ââʹnned huõl tiõrvâsvuõtthuõʹlle globaalânji kriittlaž neävvpuuʹtʼtõõzz juätkkjummšest, mii sâjjdââtt Ålaʹndde. Vieʹltʼteʹmes tuâjjmäʹtǩǩjååttlõk lij õinn vueiʹtlvaž karanteeʹnvuäʹpstõõzz jääʹǩǩteeʹl.

Palaa sivun alkuun