Hyppää sisältöön
Valtioneuvosto ja ministeriöt
Media
Valikko

Mäʹhtt piâssâp koronakriisâst ååuǥas? Muʹvddem tuåimid taarbšet kriisâst šõddâm skääđai koʹrjjeem diõtt? – Plaan valmštõõllmõš jåttai

Riikksuåvtõõzz kanslia 9.4.2020 15.00

Riikksuåvtõõzz kanslia lij miäʹrrääm 8. njuhččmannu 2020 valmštõõllâmjoouk, koon tuâjjan lij valmštõõllâd jåʹttlõs äiʹǧǧtaaulin plaan Lääʹddjânnam čuâkksen ååuǥas koronakriisâst da tuåimid kriis mâʹŋŋhåiddmõššân. Valmštõõllâmjoouk saaǥǥjååʹđteeʹjen tuåimmai riikkvääraiministeria kansliašurr Martti Hetemäki da vääʹrrsaaǥǥjååʹđteeʹjen sosiaal- da tiõrvâsvuõttministeria kansliašurr Kirsi Varhila.

Joouk valmštõõllâm plaan kätt jeäʹrbi mieʹldd tuåimid koronakriis tuejjeem tiõrvâsvuõđlai, sosiaalʼlai da ekonoomlai skääđai koʹrjjeem diõtt di pââʹj koronavueʹjj diõtt miäʹrreem rääʹjtõõzzin luõppâm diõtt. Rääʹjtõõzzin luõppmõõžž ärvvtõõllmõõžžâst vääʹldet lokku epidemiolooglaž da taalkâstiõđlaž vueʹǩǩ-kartt di ouddkâsttmõõžž COVID-19-epidemia tiõrvâsvuõttvaaiktõõzzin da õhttsažkååddlaž obbaʹrvvõs.

Valmštõõllâmjoukk kooll tuâjas poodd vaaidâsvuâlanji jieʹllemvueʹǩǩjieʹllem eeʹttǩeeʹjid di kooʹddid da meerlaž- da pirrõsorganisaatioid. Lââʹssen tuâjast seuʹrrjet jeeʹres jânnmi koronakriis mâʹŋŋhååid di kriis vaaiktõõzzid meeraikõskksiʹžže politiʹǩǩe da Euroopp uniooʹne.

Tiõđpaneeʹl da tuâjjmarkkânorganisaatioi vueʹlltuâjj-joukk tuärjjeed valmštõõllâmjoouk tuâj

Valmštõõllâmjoouk tuärjjõssân miäʹrreet tiõđpaneeʹl, koozz kååččât tuʹtǩǩeeʹjid da äʹšštobddjid jeeʹres siltteemvuuʹdin, mâʹta sosiaalpolitiikk, škooultempolitiikk da täällpolitiikk di pirrõs- da äimmõstiõttji vuuʹdin. Tiõđpaneeʹl tuâjjan lij vieʹǩǩted valmštõõllâmjoouk ärvvtõõllâd da ouddtuʹmmjed kriiʹse õhttneei vaaiktõõzzid. Paneeʹl taʹrjjad äʹšštobddituärjjõõzz kriis jeeʹres põõʹjid õhttneei tuåimi valmštõõllmõõžžâst da ärvvtõõllmõõžžâst.

Valmštõõllâmjoouk tuärjjõssân miäʹrreet še tuâjjmarkkânorganisaatioi eeʹttǩeeʹjin nårrjeei vueʹlltuâjj-joukk, kååʹtt vuäitt tuejjeed ehdtõõzzid valmštõõllâmjouʹǩǩe vaiddsânji kriis mâʹŋŋhoiddu da âʹpetraajjmõõžž õhtteeʹl.

Valmštõõllâmjouʹǩǩe vaaidâsvaaldšem eeʹttkâʹsttem

Riikksuåvtõõzz kanslia lij raukkâm puõʹtti ministeriaid nõõmeed valmštõõllâmjouʹǩǩe eeʹttǩeeʹjes 10. njuhččmannu čiâss 12 mõõneeʹst:

  • ålggministeria
  • vuõiggâdvuõttministeria
  • siiʹsǩministeria
  • peälštõsministeria
  • mättʼtõs- da kulttuurministeria
  • mädd- da meäʹcctäällministeria
  • trafikk- da saaǥǥtem-ministeria
  • tuâjj- da jieʹllemvueʹǩǩministeria
  • pirrõsministeria
  • riikksuåvtõõzz kanslia.

Tuâjjmarkkânorganisaatioi vueʹlltuâjj-jouʹǩǩe riikksuåvtõõzz kanslia lij raukkâm puõʹtti organisaatioid nõõmeed eeʹttǩeeʹjes:

Lääʹddjânnam Ämmatleettai Kõõskõsorganisaatio SAK rõ
Akava rõ
STTK rõ
Jieʹllemvueʹǩǩjieʹllem kõõskõslett EK rõ
Kåʹddtuâjjuʹvddi KT
SY Lääʹddjânnam Põõrǥâsneeʹǩǩ

Lââʹssteâđ: vueʹllriikkpiisar Timo Lankinen, teʹl. 0295 160 300, riikksuåvtõõzz kanslia

 

Palaa sivun alkuun