Hyppää sisältöön
Valtioneuvosto ja ministeriöt
Media

Haldâttâs linjij sirdâšuumeest tállân koronaepidemia estimist táásán kyehti, haldâttâs vaalmâš väldiđ spiekâstâhtile anon

Statârääđi kanslia 25.2.2021 10.26

Haldâttâs linjij kuovâmáánu 24. peeivi ráđádâlmijn čovgâdub tooimâin koronapandemia estimist já tääsi kyevti anonväldimist.

Ohtsis čiččâm pyecceetipšopirrâduv kuávlust stivrejeh väldiđ tállân anon tääsi kyevti ađai levânemmudo čovgâdumos raijiittâsâid. Toos lasseen oovce jođálmummudo kuávlun avžuutteh anon siämmáid tooimâid. Staatârääđi addel ääšist prinsiipmiärádâs onne almosčuákkimist.

Haldâttâsâst lii kiärgusvuotâ pahudiđ oles enâmân spiekâstâhtile. Heiviitmáin vuáđulaavâ 23§ laavâst asâttemnáál spiekâstâhtiileest iävtutteh steŋgiđ raavâdviäsuid kuulmâ oho ääigi njuhčâmáánu 8.–28. peeivih. Iävtuttum steŋgim ij kuoskâ epidemia vuáđutääsi kuávloid.

Ulmen tain puoh tooimâin lii viggâđ estiđ koronaepidemia jotelis jođálmum já älkkeebeht njuámmoo virushaamij levânem. 

Čovgâdumos raijiittâsah vuáimán čiččâm pyecceetipšopirrâduvâst

Puoh levânemmudo kuávluh já sierâ virgeomâhááh stivrejuvvojeh väldiđ anon tievâslávt puoh koronaepidemia levânemmudo tooimâid, meid njuámmootavdâlaavâ uđđâ váldásmitmijd

  • Vijđes káiduspargo- já muátusyejiavžuuttâs
  • Riskâjuávhui suoijim
  • Ollâškoovlâi káidusmáttááttâs
  • Almolij soojij kiävtu raijim sehe steŋgim (avžuuttâsah já miärádâsah)
  • Rävisulmui juávkkuäigiájánâstooimâ koskâldittem (avžuuttâsah já miärádâsah)
  • Máhđuliih persovnjotoluv mađhâšeijeemeerij raijiittâsah

Tai jo ovdil aanoost orroo tooimâi lasseen stivrejeh väldiđ anon čovgâdub, haldâttâs toimâvuávám tääsi kyevti miäldásijd lasetooimâid čuávvoo kuávluin:

  • Helsig já Uusimaa 
  • Varsinais-Suomi
  • Satakunta
  • Kanta-Häme
  • Vaasa
  • Åland 
  • Lappi

Lasetooimah láá čuávvooh:

  • Paijeel 6 ulmuu čokkânemraijiittâs
  • Paijeel 6 ulmuu priivaattilálâšvuođâi velttim
  • Kieldah já kieldâovtâstumeh pehtiliteh jieijâs tooimâid karanteen já sierrim olášume čuávumist

Siämmáá tooimâid já lasetooimâid avžuutteh väldiđ anon meid čuávvoo jođálmummuddoost orroo oovce kuávlust:

  • Itä-Savo
  • Maadâ-Kärjil
  • Pirkanmaa
  • Koskâ-Suomâ
  • Päijät-Häme
  • Länsi-Pohja
  • Tave-Poođâeennâm
  • Maadâ-Poođâeennâm
  • Kymenlaakso

Spiekâstâhtile já raavâdviäsui steŋgim 8.–28. njuhčâmáánu

Haldâttâsâst lii kiärgusvuotâ pahudiđ oles enâmân spiekâstâhtile. Uáiviminister lii savâstâllâm spiekâstâhtile paahudmist täsivääldi presidentijn. Ovdâskoddejuávhuh čokkâneh savâstâllâđ tiileest maŋeláá tuorâstuv. Staatârääđist lii kiärgusvuotâ meridiđ spiekâstâhtilán sirdâšuumeest puáttee ohhoost.

Raavâdviäsuid avžuutteh spiekâstâhtiileest steŋgiđ 8.–28. njuhčâmáánu, eereeb vuáđutääsi kuávluid. Purrâmuš vyebdim olgos äššigâssáid lii kuittâg suovvum.

Toos lasseen njuhčâmáánu 8. peeivi rääjist já uássin tääsi kyevti lasetooimâid, levânem- já jođálmummudo kuávlui vuáđuškoovlâ pajeluokaid stivrejeh sirdâšuđ koskâpuddâsávt káidusmáttááttâsân. Paijeel 12-ihásij juávkkuäigiájánâstooimâ pyehtih koskâldittiđ.


Lasetiäđuh: uáiviminister staatâčällee Henrik Haapajärvi, ovdânommâ.suhânommâ@vnk.fi já Pasi Pohjola, sosiaal- já tiervâsvuođâministeriö, ovdânommâ.suhânommâ@stm.fi 

Koronavirusepidemia mudoh já estimtooimâi tääsih | valtioneuvosto.fi

Sivun alkuun