Hyppää sisältöön
Valtioneuvosto ja ministeriöt
Media

Spiehkastatdilit mat ráđđejit Suomas

1.3.2021 13.30

Stáhtaráđđi lea gávnnahan ovttasráđiid dásseválddi presideanttain, ahte Suopma lea spiehkastatdilis koronavirusdili dihte. Stáhtaráđđi mearridii oktasaščoakkámisttis mánnodaga njukčamánu vuosttaš beaivve, ahte riikkas ráđđejit válmmasvuohtalága 3 § 5 čuoggás dárkkuhuvvon spiehkastatdilit. Spiehkastatdilit bohtet vuoibmái dakkaviđe. 

Válmmasvuohtalága 3 § 5 čuoggás mearriduvvo spiehkastatdillin váikkuhusaidis mielde earenoamáš duođalaš stuorabártti veardásaš hui viidát leavvan várálaš njoammudávda. 

Suomas covid-19-dávdadáhpáhusaid mearri ja almmáiduvvan leat lassánan guovvamánu 2021 álggu maŋŋel hui jođánit. Earáhuvvan koronavirusa dagahan njoammumat leat čielgasit lassánan, mii juo oasistis sáhttá jođálnuhttit epidemiija šaddama ja doalvut buohcceviesso- ja beaktodikšuma fuopmášahtti noađuheapmái, juos njoammumiid mearri ii ožžojuvvo jorgaluvvot gahččat. 

Dán muttus ii leat njuolggodárbu válmmašvuohtalága II oasi doaibmafápmudusaid atnuiváldimii, mat ráddjejit vuođđorivttiid, muhto daid geavahandárbu sorjá epidemiija gárggiideamis lagasáiggiid. Ráđđehus goitge árvvoštalai, ahte válmmasvuohtalága 15 logu njuolggadusat 106 § (hálddahusvirgeolbmuid kommunikašuvdna spiehkastatdiliin) ja 107 § (doaibmaválddi čoavdin) lea vealtameahttun guoskadišgoahtit spiehkastatdiliid gávnnaheami maŋŋel.  

Stáhtaráđi mearrádus, mii gávnnaha spiehkastatdiliid, boahtá fápmui dakkaviđe, ja dat lea fámus doaisttážii, dassážii go dat gomihuvvo. 

Ráđđehusa ovdanbuktojupmi biebmanfitnodagaid steŋgemis riikkabeivviide 

Dakkaviđe spiehkastatdiliid gávnnaheami maŋŋel stáhtaráđđi attii riikkabeivviide vuođđolága 23 § vuođul ráđđehusa ovdanbuktojumi láhkan idjadan- ja biebmandoaimmas addojuvvon lága gaskaboddasaš rievdadeamis. Das ovdanbuktojuvvo, ahte restauráŋŋat ja eará biebmansuorggi fitnodagat steŋgejuvvole áššehasain gaskaboddasaččat golmma vahkkui. Ulbmil lea, ahte láhka boahtá vuoibmái 8.3.2021, ja dat livččii vuoimmis 28.3.2021 rádjái.  

Biepmu olggosvuovdin áššehasaide livččii lobálaš. Steŋgen guoskkalii biebmansuorggi fitnodagaid guovlluin, main koronavirusepidemiija lea leavvan- ja jođálnuvvanmuttus. Spiehkastahkan livčče bargoveahka- ja eará restauráŋŋat, mat eai leat álbmogii rabas. Guovlluin mearriduvvo sierra stáhtaráđi ásahusain. 

Lassidieđut: vuollestáhtačálli Timo Lankinen, stáhtaráđi kansliija, t. 0295 160 300 (spiehkastatdilit) ja ráđđehusráđđi Liisa Huhtala, t. 029 504 7062 ja ossodathoavda Antti Neimala, t. 029 504 7039, bargo- ja ealáhusministeriija (biebmanfitnodagat)
 

Lasi fáttas

Spiehkastatdiliid gávnnaheapmi 1.3.2021 | SRK muittuhančálus

Diehtu spiehkastatdiliin

Ráđđehusa ovdanbuktojupmi: Restauráŋŋat steŋgejuvvojit gaskaboddasaččat áššehasain – biepmu sáhttá diŋgot ja viežžat | BEM dieđáhus 25.2.2021

Ráđđehus linnjii sirdáseamis dakkaviđe koronaepidemiija dássái guokte, ráđđehus válmmas váldit atnui spiehkastatdiliid | SRK dieđáhus 25.2.2021

Sivun alkuun