Kiärgusvuotâlaavâ anonväldimasâttâsah ovdâskoodán

Statârääđi kanslia 18.3.2020 9.30

Haldâttâs lii pahudâm ohtsâštooimâst täsivääldi presidentáin ete Suomâ lii spiekâstâhtiileest koronavirustile keežild. Haldâttâs linjij njuhčâmáánu 16. peeivi lasetooimâin, moi ulmen lii hitodiđ koronavirusnjuámumij levânem já suoijiđ riskâjuávhuid. Linjimeh láá vyeimist cuáŋuimáánu 13. peeivi 2020 räi. Haldâttâs linjim tooimah šaddeh vuáimán kiärgusvuotâlaavâ, njuámmumtavdâlaavâ sehe eres lahâasâttem miäldásávt.

Kiärgusvuotâlaavâ uásild staatârääđi adelij onne njuhčâmáánu 17. peeivi kyehti anonväldimasâttâs ovdâskoodán. Asâttâsâin tärkkilisteh taid kiärgusvuotâlaavâ tiätuasâttâsâid, moh tääl váldojeh anon.

Staatârääđi ovdâskoodán adelem anonväldimasâttâsah

  • Staatârääđi asâttâs kiärgusvuotâlaavâ 86, 88, 93-95 já 109 §:st asâttum toimâváldásmitmij anonväldimist. Kiärgusvuotâlaavâ 86 §:st asâttuvvoo sosiaal- já tiervâsvuođâhuolâttâs toimâohtâduvâi tooimâst, 88 §:st sosiaal- já tiervâsvuođâpalvâlusâst sehe tiervâsvuođâsuoijâlmist, 93 §:st palvâlemkoskâvuođâ iävtuin spiekâstmist, 94 §:st luovâscelkkimvuoigâdvuođâ raijiimist, 95 §:st pargokenigâsvuođâlijn sehe 109 §:st máttááttâs já škovlim orniimist tâi koskâlditmist. Asâttâs lii tárguttâs heiviittiđ 18.3.2020 rääjist. Asâttâs lii vyeimist 13.4.2020 räi.
  • Staatârääđi asâttâs kiärgusvuotâlaavâ 87 §:st asâttum toimâváldásmitmij anonväldimist ájáttâlhánnáá. Kiärgusvuotâlaavâ 87 § miäldásávt tiervâsvuođâhuolâttâsâst kevttimnáál talkkâsij, tävirij já palvâlusâi vyebdim puáhtá raijiđ oles väldikode kuávlust. Asâttâs šadda vuáimán ájáttâlhánnáá já lii vyeimist 13.4.2020 räi.

Kiärgusvuotâlaavâ ulmen lii spiekâstâhtiileest suoijiđ aalmug sehe turviđ ton áigápuáđu já staatâ ekonomiaeellim, paijeentoollâđ riehtioornig, vuáđuvuoigâdvuođâid já olmoošvuoigâdvuođâid sehe turviđ väldikode kuávlulii kuoskâhánnáávuođâ já jiečânâsvuođâ.  Staatârääđi toovâi jieht 16.3. miärádâs tast, ete staatâst lii spiekâstâhtile.

Lasetiäđuh: vyelistaatâčällee Timo Lankinen, p. 0295 160 300, staatârääđi kanslia