Gearggusvuođalága atnuiváldinásahusat riikkabeivviide

Stáhtaráđi kansliija 18.3.2020 9.30

Ráđđehus lean cealkán ovttas dásseválddi presideanttain Suoma leat spiehkastatdilis koronavirusdili geažil. Ráđđehus linnjii 16. njukčamánu lassedoaibmabijuin, maid ulbmilin lea njoahcudit koronavirusnjoammumiid leavvama sihke suddjet riskajoavkkuid.  Linnjemat leat fámus 13. cuoŋománu 2020 rádjái. Ráđđehusa linnjen doaibmabijuid buktet fápmui gearggusvuođalága, njoammudávdalága sihke eará láhkaásaheami mieldásaččat.

Gearggusvuođalága oasil stáhtaráđđi attii odne 17. njukčamánu guokte atnuiváldinásahusa riikkabeivviide. Ásahusain sirrejuvvojit dat dihto gearggusvuođalága ásahusat, mat dál váldojuvvojit atnui.

Stáhtaráđi riikkabeivviide addin atnuiváldinásahusat

  • Stáhtaráđi ásahus gearggusvuođalága 86, 88, 93-95 ja 109 §:s ásahuvvon doaibmaválddi atnuiváldimis. Gearggusvuođalága 86 §:s ásahuvvo sosiála- ja dearvvasvuođafuolahusa doaibmaovttadagaid doaimmain, 88 §:s sosiála- ja dearvvasvuođabálvalusas sihke dearvvasvuođasuddjemis, 93 §:s bálvalangaskavuođa eavttuin spiehkasteamis, 94 §:s luovascealkinvuoigatvuođa ráddjemis, 95 §:s bargogeatnegasain sihke 109 §:s oahpahusa ja skuvlema ordnemis dahje gaskkalduhttimis. Ásahusa lea dárkkuhus heivehit 18.3.2020 rájes. Ásahus lea fámus 13.4.2020 rádjái.
  • Stáhtaráđi ásahus gearggusvuođalága 87 §:s ásahuvvon doaibmaválddi atnuiváldimis dakkaviđe. Gearggusvuođalága 87 § mieldásaččat dearvvasvuođafuolahusas atnu dálkasiid, dávviriid ja bálvalusaid vuovdima sáhttet ráddjet olles váldegotti guovllus. Ásahus boahtá fápmui dalán ja lea fámus 13.4.2020 rádjái.

Gearggusvuođalága ulbmilin lea spiehkastatdiliin suddjet álbmoga sihke dorvvastit dan áigáiboađu ja riikka ekonomalaš eallima, bajásdoallat riekteortnega, vuođđovuoigatvuođaid ja olmmošvuoigatvuođaid sihke dorvvastit váldegotti guvllolaš guoskameahttunvuođa ja iehčanasvuođa.  Stáhtaráđđi dagai ikte 16.3. mearrádusa das, ahte riika lea spiehkastatdilis.

Lassedieđut: vuolit stáhtačálli Timo Lankinen, tel. 0295 160 300, stáhtaráđi kansliija