Uusimaa mäddkådda jååʹttemrääʹjtõõzz - Halltõs tuʹmmji ođđ lââʹsstuåimin koronaepidemia leävvnummuž cõggâm diõtt

Riikksuåvtõõzz kanslia 25.3.2020 22.00

Halltõs lij tuʹmmjam 25. pâʹsslašttâm-mannust 2020 rääʹjted Uusimaa mäddkååʹdd da jeeʹres mäddkooʹddi kõskksaž trafiikk 27. pâʹsslašttâm-mannust ääʹljeeʹl. Rääʹjtõõzz liâ viõǥǥâst 19. njuhččmannu 2020 räjja. Ođđ jååʹttemrääʹjtõõzzi miârktõssân lij cõggâd koronaviiruspõõžžtummšid di miâlǥeed epidemia leävvnummuž Uusimaa mäddkååʹddest jeeʹresårra Lääʹddjânnma. Halltõs uuʹdi jåå’ttemrää’jtõõzzid kuõskki vaalmâšvuõttlääʹjj âânnmaväʹlddemasetõõzz eeʹttiǩ-kååʹdd ǩiõttʼtõõllâmnalla 25. pâʹsslašttâm-mannu.

Jååʹttemrääʹjtõõzzi pueʹttmest viõʹǩǩe Uusimaa mäddkååʹdd jälsteeʹjin âlgg põõššâd mäddkååʹdd vuuʹdest. Jeeʹres mäddkooʹddi jälsteei jiâ vueiʹt jååʹtted Uusimaa mäddkååʹddest. Juõǩǩʼkast lij kuuitâǥ vuõiggâdvuõtt mäʹcced jiijjâs domm- leʹbe jälstempäiʹǩǩ-kådda. Luõvâsääiʹj mäʹtǩstõõllmõš ij leäkku sååʹvšum. Täʹvvertrafiikk jååttmõõžž jiâ ni ođđ rääʹjtõõzzi poodd cõõgg. Rääʹjtõõzz jiâ ni še kuõsk Uusimaa mäddkååʹdd seʹst jååttmõõžž.

Jååttmõš lij kuuitâǥ sååʹvšum veʹrǧǧneǩtuåimmjummšest di tuâj, jieʹllemvueʹjj leʹbe naʹddjemtuåim tuejjummuž diõtt leʹbe lääʹjjmeâldla õõlǥtemvuõđ teâuddjummuž diõtt. Jååttmõõžž jeät še rääʹjet, jõs tõõzz lij loʹsses persoonlaž mäinn, mâʹta päärna vueiʹnnlõõttâmvuõiggâdvuõđ teâuddjummuš leʹbe roodnairuåđ jääʹmmen diõtt. Pååʹles vuäpp jååʹttemrääʹjtõõzzi jääʹǩǩtummuž. Rääʹjtõõzzi puästtad tuejjummšest leʹbe jääʹǩǩtekâni kuâđđmõõžžâst pååʹles vuäitt mieʹrreed sääkk. Persoonâst feʹrttai uʹvdded pååʹles nuʹt raaukeen čiõlǥtõs jååttmõõžžâs määinast leʹbe miârktõõzzâst.

Jååʹttemrääʹjtõõzzin da tõi vueʹjji vaaiktõõzzin lij miârktõs teâđted buss-, poojâs -, jânnamvuâlaž poojâs - da räiddtrafiikk sâjldõõǥǥin da terminaaʹlin di pojjsi da buussi čuõvvtaaulin da kuultõõzzin. Teâđ aʹlǧǧe leeʹd vuäǯǯamnalla še Uusimaa mäddkååʹdd reuʹnnkooʹddin da mäddkåʹddraajid râstldeei tuâjjmäʹtǩǩtrafiikk beäʹlnn miârkteei jeeʹres päiʹǩǩ-kooʹddi kõskksaž trafikkpaaiʹǩin.

Lââʹssteâđ:

Riikksuåvtõõzz kanslia: vueʹllriikkpiisar Timo Lankinen, teʹl. 0295 160 300

siisǩministeria: pâʹjjʼjååʹđteei Tero Kurenmaa teʹl. 0295 488 340 da kansliašurr Kirsi Pimiä (saaǥǥ[email protected])

Pååʹleshalltõs:  mediakääzzkõs, teʹl. 050 3999 039 (veʹrǧǧpoodd), saaǥǥtem.pååʹleshalltõ[email protected]ååʹles.fi

Trafikk- da saaǥǥtemkoontâr Traficom: pâʹjjʼjååʹđteei Jarkko Saarimäki, teʹl. 040 836 0397