Uusimaa guvlui lihkadanráddjehusat - Ráđđehus mearridii ođđa lassedoaimmain koronaepidemiija leavvama eastadeapmin

Stáhtaráđi kansliija 25.3.2020 22.00

Ráđđehus lea mearridan 25. njukčamánu 2020 ráddjet johtalusa Uusimaa eanagotti ja eará eanagottiid gaskka 27. njukčamánu rájes. Ráddjehusat leat fámus 19. cuoŋománu 2020 rádjai. Ođđa lihkadanráddjehusaid mihttomearrin lea eastit koronavirusnjoammumiid ja njoahcudit epidemiija leavvama Uusimaas eará guvlui Supmii. Ráđđehus attii lihkadanráddjehusaid guoskevaš válmmašvuođalága atnuiváldinásahusa riikkabeivviid gieđahallamii 25. njukčamánu.

Lihkadanráddjehusaid fápmui boađedettiin Uusimaa ássit galget bissut eanagotti guovllus. Eará eanagottiid ássit eai sáhte galledit Uusimaas. Juohkehaččas lea goittotge riekti máhccat ruovttu- dahje ássanbáikegoddásis. Lustaáigge mátkkošteapmi ii leat lobálaš. Gálvojohtalusa johtima eai ođđa ráddjehusaid áigge goittotge eastte. Ráddjehusat eai maiddái guoskka Uusimaa siskkáldas lihkadeami.

Lihkadeapmi lea goittotge lobálaš virgeoapmahašdoaimmas sihke barggu, ealáhusa dahje luohttámušdoaimma hárjeheamis dahje lágasásahuvvon geatnegasvuođaid deavdimis. Lihkadeami eai maiddái ráddje, jus dasa lea nana persovnnalaš sivva, dego máná deaivvadanvuoigatvuođa ollašuhttin dahje lagašolbmo jápmin. Boles bearráigeahččá lihkadanráddjehusaid čuovvuma. Ráddjehusaid rihkkumis dahje čuovvumis biehttaleamis boles sáhttá mearridit sáhku. Olmmoš galgá bolesa bivdagis addit čielggadusa lihkadeamis sivas dahje ulbmilis.

Lihkadanráddjehusain ja daid geavatlaš váikkuhusain lea ulbmil almmuhit busse-, toga-, metro- ja trihkkajohtolaga stašuvnnain ja terminálain sihke junáid ja bussiid čuovgatávvaliin ja gulahusain. Diehtu galgá leat oažžumis maiddái Uusimaa birasgielddain ja eanagotterájáid rasttildan bargomátkejohtalusa dáfus mearkkašahtti eará báikegottiid guovddáš johtalusbáikkiin.

Lassidieđut:

Stáhtaráđi kansliija: vuollestáhtačálli Timo Lankinen, t. 0295 160 300

sisáššiidministeriija: allahoavda Tero Kurenmaa t. 0295 488 340 ja kansliijahoavda Kirsi Pimiä ([email protected])

Boleshálddahus:  mediabálvalus, t. 050 3999 039 (virgeáigge), [email protected]

Johtalus- ja gulahallandoaimmahat Traficom: allahoavda Jarkko Saarimäki, t. 040 836 0397