Maht mij peessâp koronakriisâst olgos? Magareh tooimah tarbâšuvvojeh kriisâst šoddâm vahâgij tivomân? – Vuávám valmâštâllâm vuálgá joton

Statârääđi kanslia 9.4.2020 15.00

Staatârääđi kanslia lii asâttâm cuáŋuimáánu 8. peeivi 2020 valmâštâllâmjuávhu, mon pargon lii valmâštâllâđ jotelis äigitavluin vuávám Suomâ kiäinun olgos koronakriisâst já tooimâid kriisâ monnjâtiipšon. Valmâštâllâmjuávhu saavâjođetteijen tuáimá staatâvarijministeriö kansliahovdâ Martti Hetemäki já värisaavâjođetteijen sosiaal- já tiervâsvuođâministeriö kansliahovdâ Kirsi Varhila.

Juávhu valmâštâllâm vuávám luávdá eereeb iärrás tooimâid koronakriisâ tovâttem tiervâsvuođâlij, sosiaallij já ekonomâlij vahâgij tivomân sehe muddoid koronatile tiet asâttum raijiittâsâin luoppâmân. Raijiittâsâin luoppâm árvuštâlmist váldoo huámmášumán epidemiologâlâš já talhâstieđâlâš kove tiileest sehe ennustâsâid COVID-19-epidemia tiervâsvuođâvaikuttâsâin já ohtsâškodálâš olesárvuštâllâm.

Valmâštâllâmjuávkku kulá pargos ääigi vijđáht iäláttâseellim ovdâsteijeid sehe kieldâid já aalmuglâš- já pirâsseervijd. Toos lasseen pargoost čuávuh eres enâmij koronakriisâ monnjâtipšo sehe kriisâ vaikuttâsâid aalmugijkoskâsii politiikân já Euroop unionân.

Tieđâpaaneel já pargomarkkânseervij vyelipargojuávkku tuárjuđ valmâštâllâmjuávhu pargo

Valmâštâllâmjuávhu toorjân asâttuvvoo tieđâpaaneel, moos pivdeh totkeid já äššitobdeid sierâ mättimkuávluin, tego sosiaalpolitiik, škovlimpolitiik já ekonomiapolitiik sehe pirâs- já šoŋŋâdâhtiettui syergist. Tieđâpaaneel pargon lii išediđ valmâštâllâmjuávhu árvuštâllâđ já munediđ kriisân lohtâseijee vaikuttâsâid. Paaneel fáálá äššitobdeetorjuu kriisâ sierâ muddoid lohtâseijee tooimâi valmâštâlmist já árvuštâlmist.

Valmâštâllâmjuávhu toorjân asâtteh meid pargomarkkânseervij ovdâsteijei vyelipargojuávhu, mii puáhtá toohâđ iävtuttâsâid valmâštâllâmjuávkun vijđáht kriisâ monnjâtiipšon já uđđâsisthuksiimân kulen.

Valmâštâllâmjuávkun maaŋgâ syergi ovdâstem

Staatârääđi kanslia lii pivdám čuávvoo ministeriöid nomâttiđ valmâštâllâmjuávkun ovdâsteijes cuáŋuimáánu 10. peeivi tme 12 räi:

  • olgoministeriö
  • riehtiministeriö
  • sisministeriö
  • piäluštâsministeriö
  • máttááttâs- já kulttuurministeriö
  • eennâm- já meccituáluministeriö
  • jotolâh- já viestâdemministeriö
  • pargo- já iäláttâsministeriö
  • pirâsministeriö
  • staatârääđi kanslia.

 

Pargomarkkânseervij vyelipargojuávkun staatârääđi kanslia lii pivdám čuávvoo seervijd nomâttiđ ovdâsteijeid:

Suomâ Áámmátseervij Kuávdášservi SAK ry
Akava ry
STTK ry
Iäláttâseellim kuávdášlitto EK ry
Kieldâpargoadeleijeeh KT
SY Suomâ Irâtteijeeh

Lasetiäđuh: vyelistaatâčällee Timo Lankinen, p. 0295 160 300, staatâräädi kanslia