Hoppa till innehåll
Statsrådet och ministerierna
Media

Haldâttâs meridij arâšoddâdem já vuáđumáttááttâs raijiittâsâi raččomist

Statârääđi kanslia 30.4.2020 12.30

Haldâttâs meridij ráđádâlmijn onne cuáŋuimáánu 29. peeivi raččođ arâšoddâdem já vuáđumáttááttâs raijiittâsâid tiervâsvuođâvirgeomâhái árvuštâllâm vuáđuld. Maasâd aldamáttááttâsân sirdâšuveh vyesimáánu 14. peeivi rääjist kontrollistum vuovvijn já nuuvt, ete huolâtteh torvolâšvuođâst. Siämmást máttááttâs uárnejeijeeh kiergâneh varriidâttâđ pargee- já eres orniistâlmijguin máttááttâs olášutmân.

Epidemiologâlii árvuštâllâm vuáđuld iä lah innig vuáđustâsah juátkiđ kiärgusvuotâlaavâ heiviittemasâttâs, mii kuáská arâšoddâdmân já vuáđumáttááttâsân.

Aalmugijkoskâsiih já päikkieennâmliih feerimeh láá čáittám, ete párnái rooli koronavirusnjuámumij sirden ij lah siämmáálágán ko rävisulmuin. Párnááh iä jur lah njuámumij käldeeh. Te tááláá tiäđu vuáđuld škoovlâi lekkâm lii torvolâš sehe uáppeid já pargoviehân.

Máttááttâs- já kulttuurministeriö já Tiervâsvuođâ já pyereestvaijeem lájádâs láá ráhtám ornimravvuid, maid nuávditmáin pasteh maccâđ arâšoddâdmân já vuáđumáttááttâsân. Tehálumos lii velttiđ taarbâšmettum fyysisijd kontaktijd já orniđ máttááttâstileh tienuuvt, ete tain lii eenâb tile persovn kuáttá. Meid tijmekooskâid já škovlâpurâdem kalga orniđ jieijâs luokkain tâi juávhoin. Stuorrâ čokkânmeh, tego kiđđâjuhleh, iä uárnejuu. Meid pargeeh kalgeh toimâđ siämmáin pärnijuávhoin já hygieniaravvuid kalga nuávdittiđ tárkká. Ornimij detaljin merideh máttááttâs uárnejeijeeh.

Sosiaal- já tiervâsvuođâministeriö já máttááttâs- já kulttuurministeriö valmâštâleh oovtâst raavâreeivâ kuávluhaldâttâhvirgáduvváid. Epidemia levânem ohtsâškoddeest räijejeh arâšoddâdem já vuáđumáttááttâs uásild njuámmumtavdâlaavâ vuáđuld.

Tuáhtár árvuštâl riskâjuávhui uásálistem aldamáttááttâsân. Pargei uásild árvuštâllâm tahhoo oovtâst pargotiervâsvuođáin já pargoadeleijein.

Ko heiviittemasâttâs vyeimistorroom jaska, te máttááttâs uárnejeijee ij paste orniđ máttááttâs káidusmáttááttâssân. Kieldâ ij paste meridiđ jieijâs miärádâssáin škoovlâi steŋgiimist ijge kieldâ meid paste meridiđ máttááttâs orniimist tuše káidusmáttááttâssân. Vuoigâdvuotâ finniđ vuáđumáttááttâs lii vuáđulaavâst meridum subjektiivlâš vuoigâdvuotâ, mii kulá oovtviärdásávt puohháid.

Haldâttâs kieđâvuš nube tääsi já ollâškovlim raijiittâsâid maŋeláá.

Lasetiäđuh: kansliahovdâ Anita Lehikoinen, puh. 0295 330 182, uásádâhhovdâ, pajehovdâ Eeva-Riitta Pirhonen, p. 0295 330 258, máttááttâs- já kulttuurministeriö, já staatâräädi viestâdemhovdâ Päivi Anttikoski, p. 040 536 4821

Tillbaka till toppen