Toimâohjelm sämikielâ iäláskitmân
Staatâräädi tuhhiittij 3.7.2014 prinsiipmiärádâs toimâohjelmist, moin iäláskittoo nuorttâsämikielâ, aanaarsämikielâ já tavesämikielâ kevttim. Ohjelmijn nanosmittoo eres lasseen sämikielâlâ arâoddâdem já kielâpiervâltoimâ sehe ovdeduvvoo sämikielâ máttááttâs ubâ enâmist.
Ohjelm ulmen lii, et sämikielâi sárnooh láá táálást eenâb, palvâlusah pyevtittuvvojeh sämikielân já kielâ kevttim annoo áárvust. Tááláá ääigi puoh kulmâ Suomâst sarnum sämikielâ – tavesämikielâ, aanaarsämikielâ já nuorttâsämikielâ – láá uhkevuálásiih já eromâávt aanaarsämikielâ já nuorttâsämikielâ jo lappumvaarâst.
Prinsiipmiärádâs mield sämikielâ já sämikielâlâ máttááttâs ovdeduvvoo já lasettuvvoo eromâávt sämikuávlu ulguubeln, kost ääsih suullân 70 % sämipárnáin já -nuorâin. Káidusmáttááttâs ovdeduvvoo turvid máttááttâs sämikuávlu ulguubeln. Lasseen kalga lasettid sämikielâ mättee pehtilis arâoddâdem- já máttááttâspargovievâ mere sehe pajedid ceehij mield oppâmateriaal pyevtitmân väridum ruttâdem.
Sämikielâ iäláskittem várás vijdeduvvoo meid kielâpiervâltoimâ orniimáin párnáid sämikielâlâ peivitipo tâi ávus arâoddâdemtooimâ sehe kovlilijd eehidpeivitooimâ kevttimáin kielâlávgumvuáháduv.
Kielâ tipom, vuorkkim já tutkâm sehe sämikulttuur ovdeduvvoo. Juurdân lii meiddei vuádudij uáivikaavpugkuávlun sämmilij kuáhtámsaje/toimâmkuávdáá säämi kulttuur já kielâi oovdedmân já Cevetjáávrán nuorttâsämikielâlâ kielâ- já kulttuurkuávdáá, mon ohtâvuotân puáhtá lääccid sierâlágán nuorttâsämikielâlâ palvâlusâid já tiätupalvâlem.
Meid tiedettemriäiduin lii tehálâ pargo sämikielâi iäláskitmist. Ulmen lii, et sämikielâlâ mediafalâldâh puoh kuulmâ sämikielân licij eenâb já ohjelmoovtâstpargo tohhuuccij raajij paijeel Ruotâenâmáin já Taaâenâmáin.
Tääl tuhhiittum prinsiipmiärádâs tyehin lii haldâttâsohjelm kirjim, mast vátámâân lii sämikielâ iäláskittemohjelm tooimâi oláuttem já resurssij turvim. Miärádâ linjee staatâräädi ulmetääsi. Uási tooimâin ruttâduvvoo tááláid meriruudâid cuosâtmáin já laseruudâ vättee tooimâin meriduvvoo staatâekonomia raamij já ihásij budjetij ooleest.
Staatâräädi prinsiipmiärádâs oovded jieijâs uásild vuádulaavâ tähidem vuoigâdvuodâ sämmiláid algâaalmugin paijeentoollâd já ovdedid jieijâs kielâ já kulttuur. Sämikielâ iäláskittemohjelm rähtim asâttui ulmen staatâräädi ovdâskoodán adelem olmoovuoigâdvuodâcielgiittâsâst ive 2009. Prinsiipmiärádâs vuáduduvá ohjelmân, mon valmâtâllâm jodettij máttááttâs- já kulttuurministeriö, já mast tuállojii rádádâlmeh sämitiggijn kuovâmáánust 2014.
Lasetiäduh:
spesiaalvuávájeijee Mikko Cortés Téllez, puh. 0295 3 30080
máttááttâsneuvos Maija Innola, puh. 0295 3 30120
Staatâräädi prinsiipmiärádâs toimâohjelmin sämikielâ iäláskittem (pdf) várás lii luuhâmnáál Staatâräädi internetsiijdoin http://valtioneuvosto.fi/toiminta/periaatepaatokset/fi.jsp
Sämikielâid sárnuh neelji staatâ kuávlust: Suomâst, Ruotâst, Taaâst já Ruoâst. Sämmiliih láá rekinistemvyevi mield 60 000–100 000 olmoid, main suullân 10 000 äässih Suomâst. Suomâst sárnuh kulmâ sämikielâ: aanaarsämikielâ, nuorttâsämikielâ já tavesämikielâ. Ive 1992 rääjist sämikielâin lii lama Suomâst virgálâ sajattâh sämikuávlust adai Iänuduv, Aanaar já Ucjuv kieldâin sehe Suádigil taveuásist.