Sámiid duohtavuohta- ja soabadankomišuvnna ávžžuhusaid árvvoštallama doarju koordinašuvdna- ja čuovvunjoavku álggaha barggus 

Stáhtaráđđi lea odne ovttasráđiid Sámedikkiin ja Nuortalaččaid siidačoahkkimiin ásahan Sámiid duohtavuohta- ja soabadankomišuvnna ávžžuhusaid árvvoštalli parlamentáralaš bargojoavkku koordinašuvdna- ja čuovvunjoavkku. Joavku doarju parlamentáralaš bargojoavkku barggu ja váfista ovttasbarggu guovddášdoibmiid gaskkas.

Skábmamánus 2025 ásahuvvon parlamentáralaš bargojoavku válmmastallá oktasaš oainnu das, maidda doaimmaide Sámiid duohtavuohta- ja soabadankomišuvnna loahpparaportta ávžžuhusaid vuođul galgá álgit. 

Koordinašuvdna- ja čuovvunjoavkku bargun lea doarjut parlamentáralaš bargojoavkku barggu ávžžuhusaid árvvoštallamis, koordineret ovttasbarggu parlamentáralaš bargojoavkku, Sámedikki ja Nuortalaččaid siidačoahkkima gaskkas sihke čuovvut sierra doibmiid barggu ávžžuhusaid ovddideami ja ollahuhttima várás. Dasa lassin joavku ovddida loahpparaportta dieđu gaskkustuvvama suopmelaš servodagas ja stáhtahálddahusas. 

”Sámiid duohtavuohta- ja soabadankomišuvnna parlamentáralaš bargojoavkku bargu lea vuolgán bures johtui. Dál ásahuvvon koordinašuvdna- ja čuovvunjoavku sihkkarastá, ahte komišuvnna ávžžuhusat gieđahallojuvvojit deahtta ovttasbarggus sápmelaččaiguin”, gávnnaha oaiveministtar Petteri Orpo.

”Koordinašuvdna- ja čuovvunjoavkku vuođđudeapmi lea boađus guhká bistán ja huksejeaddji ságastallamiin stáhtain. Joavkku bargun lea sihkkarastit, ahte sápmelaččain ja stáhtas lea ovttaveardásaš báiki ovddidit duohtavuohta- ja soabadankomišuvnna ávžžuhusaid ollahuhttima ja ahte komišuvnna buvttadan diehtu heivehuvvo atnui jearggalaččat stáhtahálddahussii. Dát ovttasbargoorgána fállá oktasaš beavddi, mas sáhttá ovdánuvvot viiddit parlamentáralaš ollisvuođa oassái”, dadjá Sámedikki ságadoalli sadjásaš Tuomas Aslak Juuso.

"Vuordit, ahte koordinašuvdna- ja čuovvunjoavkku ásaheapmi dorvvasta Nuortalaččaid siidačoahkkima osolašvuođa duohtavuohta- ja soabadankomišuvnna barggu bohtosiid árvvoštallamis ja ávžžuhusaid ollašuhttima joatkkadoaimmain”, dadjá Nuortalaččaid luohttámušolmmoš Veikko Feodoroff.

Koordinašuvdna- ja čuovvunjoavkkus lea ovddastus Sámedikkis, Nuortalaččaid siidačoahkkimis, stáhtaráđi kansliijas ja vuoigatvuođaministeriijas. Joavkku ságadoallin doaibmá oaiveministara stáhtačálli Risto Artjoki.

Sámiid duohtavuohta- ja soabadankomišuvdna luobahii loahpparaporttas stáhtaráđđái, Sámediggái ja Nuortalaččaid siidačoahkkimii juovlamánu 4. beaivvi 2025. 

Lassidieđut:
váldočálli Antti Rinne, t. 0295 160 573, ossodathoavda Harri Martikainen, t. 0295 160 856
stáhtaráđi kansliija, Sámedikki ságadoalli sadjásaš Tuomas Aslak Juuso t. 040 687 3394 ja Nuortalaččaid luohttámušolmmoš Veikko Feodoroff t. 050 396 1297