Säʹmmlai tuõttvuõtt- da suåvâdvuõttkomissio siâzztõõzzi ärvvtõõllmõõžž tuärjjeei koordinaatio- da seuʹrrjemjoukk alttad tuâjas

Riikksuåvtõs lij täʹbbe õhttsažtuâjast Sääʹmtiiʹǧǧin da Saaʹmi siidsåbbrin šiõttääm Säʹmmlai tuõttvuõtt- da suåvâdvuõttkomissio siâzztõõzzid ärvvtõõlli parlamentaarlaž tuâjj-joouk koordinaatio- da seuʹrrjemjoouk. Joukk tuärjjad parlamentaarlaž tuâjj-joouk tuâj da ravvad õhttsažtuâj kõskksaž toiʹmmjeeʹji kõõskâst.

Skamm-mannust 2025 šiõttuum parlamentaarlaž tuâjj-joukk valmštââll õhttsaž vuäinalm tõʹst, måkam tååimaid Säʹmmlai tuõttvuõtt- da suåvâdvuõttkomissio lopprapoort siâzztõõzzi vuâđald âlgg altteed.

Koordinaatio- da seuʹrrjemjoouk tuâjjan lie tuärjjeed parlamentaarlaž tuâjj-joouk tuâj siâzztõõzzi ärvvtõõllmõõžžâst, koordinâʹstted õhttsažtuâj parlamentaarlaž tuâjj-joouk, Sääʹmteeʹǧǧ da Saaʹmi siidsåbbar kõõskâst di seuʹrrjed jeeʹres toiʹmmjeeʹji tuâj siâzztõõzzi oouʹdeem da toimmupiijjâm diõtt. Lââʹssen joukk oouʹdad lopprapoort teâđai vääʹltõõvvmõõžž lääʹdd õhttsažkååʹddest da riikkvaldšmest.

”Säʹmmlai tuõttvuõtt- da suåvâdvuõttkomissio parlamentaarlaž tuâjj-joouk tuâjj lij älggam puârast. Ååʹn šiõttuum koordinaatio- da seuʹrrjemjoukk ainsmâtt, što komissio siâzztõõzzid ǩiõttʼtõõlât čââpp õhttsažtuâjast säʹmmlaivuiʹm”, tuâtt väʹlddminister Petteri Orpo.

”Koordinaatio- da seuʹrrjemjoouk vuâđđummuš lij puäđõs kuuʹǩǩ piʹštti da raajji saǥstõõllmõõžžin riikkin. Joouk tuâjjan lij ainsmâʹtted, što säʹmmlain da riikkâst lij õõutverddsaž päiʹǩǩ oouʹdeed tuõttvuõtt- da suåvâdvuõttkomissio siâzztõõzzi toimmupiijjmõõžž da što komissio puuʹtʼtem teâđ viiǥǥât seämma vuâđđjurddjid jääʹǩǩteeʹl riikkvaldšma. Tät õhttsažtuâjjorgaan taʹrjjad õhttsaž pååʹrd, koʹst vueiʹtet ouddned veiddsab parlamentaarlaž obbvuõđ vueʹssen”, ceälkk Sääʹmteeʹǧǧ saaǥǥjååʹđteei sâjjsaž Tuomas Aslak Juuso.

”Vueʹrddep, što koordinaatio- da seuʹrrjemjoouk šiõttummuš stään Saaʹmi siidsåbbar vuässadvuõđ tuõttvuõtt- da suåvâdvuõttkomissio tuâj puäđõõzzi ärvvtõõllmõõžžâst da siâzztõõzzi toimmupiijjmõʹšše õhttneei juätkktååimain”, ceälkk saaʹmi ouddooumaž Veikko Feodoroff.

Koordinaatio- da seuʹrrjemjooukâst lie oudsteei Sääʹmteeʹǧǧest, Saaʹmi siidsåbbrest, riikksuåvtõõzz kansliast di vuõiggâdvuõttministeriast. Joouk saaǥǥjååʹđteeʹjen tåimm väʹlddministeeʹr riikkpiisar Risto Artjoki.

Säʹmmlai tuõttvuõtt- da suåvâdvuõttkomissio luõvti lopprapoortâs riikksuåvtõʹsse, Sääʹmtegga da Saaʹmi siidsåbbra rosttovmannu 4. peeiʹv 2025.

Lââʹssteâđ:
väʹlddpiisar Antti Rinne, teʹl. 0295 160 573, juâǥǥasjååʹđteei Harri Martikainen, teʹl. 0295 160 856
riikksuåvtõõzz kanslia, Sääʹmteeʹǧǧ saaǥǥjååʹđteei sâjjsaž Tuomas Aslak Juuso teʹl. 040 687 3394 da saaʹmi ouddooumaž Veikko Feodoroff teʹl. 050 396 1297