Boahttevaš geasi Duortnoseanus suvvojuvvo en guovtti luosa sálaš guolásteaddji guovdu
Duortnoseanu guolástanmearrádusat bissot eatnoguovllus measta ovddešlágánin diimmáža ektui. Eanan- ja meahccedoalloministeriija sihke Ruoŧa mearra- ja čáhceeiseváldi šihttet boahttevaš guolástanáigodaga guolástanmearrádusain Duortnoseanu soahpamušguovllus, ja dat bohtet vuoibmái 1.6.2026.
Suopma ja Ruoŧŧa šiehtadallaba Duortnoseanu guolástanmearrádusain jahkásaččat. Ulbmilin lea sihkkarastit, ahte mearrádusat leat gokčevaččat guollemáddodagaid dili ektui ja ahte soahpamušguovllus lea ceavzilis guolásteapmi.
Duortnoseanu guolástanmearrádusain jotkojuvvo guolásteaddjiguovdasaš eanemusat guovtti luosa sálašdihtomeari heiveheapmi, mii guoská oba guolástanáigodaga ja visot guolástanvugiid, mat jogas adnojuvvojit. Guovtti sálašin goddojuvvon luosa maŋŋel luossabivdu galgá heitojuvvot loahppaáigodahkii. Áigodatguovdasaš dihtomeari atnima joatkin bealuštuvvui viidát čanusjoavkkuid cealkámušain.
Luossaguolásteapmi Duortnoseanus álgá mánnodaga 8.6. d. 19.00. Maŋemus lobálaš guolástanbeaivi lea 15.8.
Dán maŋŋel luosa bivdin lea lobálaš 25.8. rádjái vuokkaiguin, main rohkiin eai leat ávnnjaldagat. Dalle visot sálašin goddojuvvon badjel 65 sentemettara guhkkosaš luosat galget luitojuvvot dakkaviđe. Mearrádusain viggojuvvojit fuolahit guolástanturismafitnodagaid doaibmaeavttut vuhtii válddedettiin seammas, ahte dutkamuša mielde luosat cevzet borgemánus buorebut gieđahallama go geasi álgogeahčen.
Dasa lassin šihttojuvvui, ahte fatnasis bivddedettiin sáhttet leat eanemusat njeallje stávrrá háválassii fatnasa guovdu. Fatnasis sáhttet seailluhuvvot eanet stávrrát, juos ulbmil lea ovdamearkka dihte gaskkohagaid oaggut luosa ja gaskkohagaid guolástit eará vugiid mielde. Loktenroahkki nađain lea en gildojuvvon, muhto dan atnui sáhttá doaibmanrájálašvuođa vuođul oažžut eallinfápmoguovddážis lobi. Dáiguin ráddjehusaiguin dorjojuvvojit sihke luossa-, dápmot- ja hárremáddodagat.
Guolástusmearrádusšiehtadallamiid vuođđun adnojuvvojit Luondduriggodatguovddáža ja Ruoŧa eanandoallouniversiteahta SLU ráhkadan raporta Duortnoseanu guollemáddodagaid dilis.
Boahttevaš guolástanáigodahkii šihttojuvvon bivdoráddjehusat bohtet dárbbus doarjut luosa eatnáneami Duortnoseanus. Šihttojuvvon doaimmaiguin várjaluvvojit eatnáneami ja máŋggahápmásašvuođa dáfus divrras stuora luosat, mat gorgŋot etnui guolástanáigodaga álggus ja mat leat mannan eanus iežaset gođđoreviirraide guolástanáigodaga loahpas.
Beavdegirjjiin šihttojuvvon mearrádusat dolvojuvvojit álbmotlaš láhkaásaheapmái stáhtaráđi ásahusain. Ásahusa mieldásaš beavdegirji almmustuhttojuvvo maid stáhtašiehtadusráiddus.
Čuovus: Beavdegirji Suoma ja Ruoŧa šiehttan guolástanmearrádusain Duortnoseanus jagi (pdf))
Lassidieđut Duortnoseanu guolástanmearrádusain eanan- ja meahccedoalloministeriijas
Orian Bondestam, ráđđádalli virgeolmmoš, ealáhusguolledoalloovttadat, t. 0295 162 494, [email protected]
Tapio Hakaste, ráđđádalli virgeolmmoš, meahccedoalloovttadat, t. 0295 162 152, [email protected]